„Охридски Бисер Филеви“ - препознатлив бренд кој привлекува гости од целиот свет и го промовира македонскиот туризам

Интервју со м-р Михајло Филев, сопственик и генерален менаџер на „Охридски бисер Филеви“ и почесен конзул на Р. Србија во Р. Македонија. Филев во интервјуто зборува за долгогодишната семејна традиција на изработка на охридски бисери, која во нивната фамилија датира уште од далечната 1928 година и трае до ден-денес. Охридскиот бисер е симбол на најтуристичкиот град во Македонија, Охрид, кој покрај природните убавини и културно-историски знаменитости, несомнено привлекува гости од целиот свет. 

М-р Филев говори и за засилување на туристичката понуда во Охрид и Македонија воопшто, за балканските тури и борбата да се надгради македонскиот туризам во сите сфери.

„Секако дека државата и локалната самоуправа, заедно со сите прогресивни луѓе и идеи, мотивирано ќе реализира повеќе планови како што се субвенциите во туризмот, стимулирање за инвестиции во туризмот и подобрување на инфраструктурата, како и зголемување на авиолиниите од различни дестинации.“, вели Филев во интервјуто за „Марили“. 

МАРИЛИ: Како репрезент на најпознатиот бренд „Охридски бисер Филеви“ и експерт кој е едуциран во полето на туризмот, како го оценувате туристичкиот подем во Охрид и Охридскиот регион, особено во постпандемискиот период?

М-Р ФИЛЕВ: После ковид пандемијaта, Охрид и Македонија повторно се реанимираа во сите стопански гранки, секако и во туризмот, каде бележиме забрзан раст и подем во посетата на нашата најпозната туристичка дестинација - Охрид. Како четврта генерација изработувач на охридскиот бисер од семејството Филеви и еден од најстарите брендови на Охрид и регионот, заштитен како индустриска сопственост и прогласен како светско културно наследство, ми претставува чест и задоволство што сме поврзани во туристичката дејност и претставува една содржина и приказна за привлекување на туристите да го посетат Охрид.

Преку нашите содржини, проекти со Охридскиот бисер и презентации, на атрактивен начин, преку историјат за рачната технологијата на занаетот, пред туристите во Музејот на Охридскиот бисер,  допринесуваме да се запознаат посетителите и со другите содржини од секаков тип од бесконечно долгата понуда на охридскиот регион. Почнувајќи од материјалните, културните, но и природните содржини на регионот доплнително допринесуваме и за подобрување и на економијата, а задоволните туристи имаат добри препораки и причина да не посетат повторно.

МАРИЛИ: Колку Охрид како град со најстарото езеро во Европа заштитено од УНЕСКО, дополнително со своето културно-историско богатство, претставува магнет за туристите од целиот свет? Што да се направи дополнително за Охрид да стане уште поатрактиван на светската туристичка мапа?

М-Р ФИЛЕВ: За Охрид не постојат толку убави зборови за да се опише она што го направила природата. Тука секако се надополнуваат и историјата и верската култура на народите коишто живееле во овој регион и оставиле неизбришлива трага низ 7000 -годишниот циклус во градењето на Охрид.

Охрид мора да се почувствува, да се доживее, па затоа веќе сме најсвестлата точка на светската туристичка мапа и посакувана дестинација на секој турист. Затоа, сите чинители на туризмот на Охрид, мора да имаме огромна одговорност за сѐ ова што постои како основа да се одржува, да се зачува,  а истовремено да се бориме да создадеме нови содржини, да надградиме сѐ во секоја сфера за да бидеме подобри, попривлечни за постигнување на елитен туризам.

Секако дека државата и локалната самоуправа, заедно со сите прогресивни луѓе и идеи, мотивирано ќе реализира повеќе планови како што се субвенциите во туризмот, стимулирање за инвестиции во туризмот и подобрување на инфраструктурата, како и зголемување на авиолиниите од различни дестинации.

МАРИЛИ: Вие сте почесен конзул на Р. Србија во Р. Македонија. Колку оваа позиција е важна за економската и туристичката соработка со Р. Србија, и колкава е застапеноста на српските туристи?

М-Р ФИЛЕВ: Р. Србија и Р. Македонија како најблиски братски држави, идеално поврзани во секаква позитивна смисла како во минатото, денес и во иднина, тоа претставува и силна економска и стопанска врска помеѓу двата народа а во сферата на туризмот, заемна посетеност.

Па затоа, како почесен конзул на Р. Србија во Македонија со седиште во Охрид, ми претставува огромна чест и задоволство да допринесам максимално со целиот мој потенцијал, капацитет и семеен углед во уште поцврсто, нераскинливо поврзување на двата братски народи во сферата на културата, економијата, спортот и туризмот како најбитна економска гранка за развојот на Охрид и Македонија, бидејќи српските туристи се во најголем број и тој број уште ќе расте.

МАРИЛИ: Како соработува регионот во однос на развојот на туризмот и какви се Вашите сознанија во однос на организираните Балкански тури? Треба ли да се засили регионалната соработка за туристички, но и економски развој на Македонија и регионот?

М-Р ФИЛЕВ: Регионот забрзано се развива и Охрид е на мапата на кружните посети на туристи кои се сместени во Албанија, Србија, Грција и Црна Гора.

Соработката со Охрид и Македонија е одлична и тоа претставува уште еден бенефит плус за економијата.

Во иднина треба да се организира уште подобро регионалната соработка со организирање на средби помеѓу туристичките работници и институциите на државите, за да се овозможат уште подобри услови и да расте бројот на туристите во целиот регион.

МАРИЛИ: Како Михајло Филев се справува со многубројните работни и приватни обврски? Што Ви дава елан и енергија за да продолжите по зацртаниот пат?

М-Р ФИЛЕВ: Сѐ во животот се постигнува пред сѐ со посебен мотив и љубов за определената цел, макотрпна работа, самоконтрола, толеранција и многу откажувања, а семејната поддршка и разбирањето се најбитни во целата приказна за успехот да биде неминовен. Сето тоа ми беше столб во досегашниот постигнат успех.

Уште од моите почетоци, најголем мотив ми претставуваше да се огледам на моите претци, на се она што го постигнале и ми го оставиле во гените и воспитувањето, а тоа е чесноста, почитта кон сите луѓе, чистиот образ, работливоста, упорноста, човекољубието, емпатијата, хуманизмот, и на крај тајната за Охридскиот бисер, кој е најголемиот позитивен товар, сето ова да го зачувам и надградам и да го пренесам на идните генерации како аманет да бидат уште подобри и да допринесе уште повеќе за целиот регион.

Статијата е прочитана 151 пати.

Сподели: