МАКЛАБ ја организира 5.Меѓународна конференција „Квалитет и компетентност“ наменета за лабораториите за квалитет на животната средина

Интервју со м-р Магдалена Трајковска Трпевска, основач и генерален менаџер на „Технолаб“ и претседател на Македонското здружение на лаборатории и инспекциски тела МАКЛАБ, во кое зборува за претстојната јубилејна конференција „Квалитет и компетентност“ која ќе се одржи од 29.09 до 02.10.2022 година во хотел „Силекс“ во Охрид

 

МАРИЛИ: Непосреден повод за ова интервју е Вашиот ангажман околу Меѓународната конференција „Квалитет и компетентност“ што ја организира МАКЛАБ, чиј претседател сте Вие. За каква конференција станува збор, кога ќе се одржи, на што ќе биде ставен фокусот и од каде се ќе имате гости?

ТРАЈКОВСКА ТРПЕВСКА: Оваа година, Македонското здружение на лаборатории и инспекциски тела МАКЛАБ, чиј претседател сум јас, во соработка со Институтот за акредитација на Република Северна Македонија ја организира петтата Меѓународната конференција „Квалитет и компетентност“ 2022. Станува збор за јубилејна, петта конференција со меѓународно учество, која требаше да ја организираме минатата година по повод 10-годишното постоење на МАКЛАБ, но заради Ковид пандемијата ја одложивме за оваа година. Конференција ќе се одржи во Охрид од 29.09 до 02.10.2022 година во хотел „Силекс“. Со особен интерес ја организираме конференцијата по петти пат, со што сме чекор поблиску до нашата цел: поврзување на лабораториите од нашата држава но и од европските држави, при што преку размена на сопствени искуства создаваме компетентна, ефикасна и одржлива структура за квалитет на национално, регионално и меѓународно ниво. 

Всушност, конференцијата „Квалитет и компетентност 2022“ ја организираме со цел:

·        Промовирање на квалитетот и компетентноста на лабораториите и инспекциските тела

·        Размена на искуства и меѓусебно информирање

·        Надградување, унапредување и промовирање на лабораториите за тестирање и калибрација и испекциските тела преку презентација на нивните достигнувања, развојни резултати, искуства и предизвици при имплементацијата на системите за квалитет

Теми на годинашнава конференција се:

ü Национална и европска законска рамка за обезбедување квалитет и  Промовирање на акредитацијата како потврда на квалитетот

ü Основни принципи и развојни трендови во лабораториите за тестирање, калибрација и инспекциски тела, колку и како ги користиме модерните технологии

ü Квалитетот како имиџ на лабораториите за тестирање и калибрација, инспекциските тела и телата за сертификација, предизвици и решенија

ü Тестирање и контрола во животната средина, индустријата и земјоделството 

ü Улогата на лабораториите во развојот на стопанството

ü Испитување и сертификација на производи наменети за домашниот пазар и за европските пазари

Работните сесии на конференцијата „Квалитет и компетентност 2022“ содржински ќе ја следат целта на конференцијата и во рамките на сесиите ќе бидат презентирани трудови од повеќе области на лабораториската пракса кои меѓу другото се поврзани со обезбедување квалитет на лабораториите за тестирање и калибрација согласно меѓународниот стандард MKC EN ISO/IEC 17025:2018. 

Се надеваме дека 5. Меѓународната конференција „Квалитет и компетентност 2022“ ќе ги надмине нашите очекувања, особено во сегментот на споделување искуства и проширување на можностите за идна соработка.

Веќе имаме пријавено учесници како од нашата држава така и од странство. Особена чест имаме да бидеме домаќини на претставници од Меѓународната асоцијација на лаборатории „Еуролаб“ со седиште во Брисел, од хрватската асоцијација на лаборатории „Кролаб“, од турската асоцијација „Турклаб“. Исто така, најавено е присуство и на директорите на акредитационите тела на лаборатории од Р. Србија, од Босна и Херцеговина, од Црна Гора, од Хрватска и од Албанија кои, во рамките на посебна сесија т.н. регионална средба ќе ги споделат со сите учесници своите искуства и достигнувања во областа на акредитацијата на лабораториите и инспекциските тела од регионот.  

Сигурна сум дека со 5. Меѓународната конференција „Квалитет и компетентност 2022“ ќе бидеме чекор понапред кон компетентна, ефикасна и одржлива структура за квалитет призната на национално, регионално и меѓународно ниво. 

 

МАРИЛИ: Што претставува МАКЛАБ, кој го сочинува членството и која е целта на нејзиното делување?

ТРАЈКОВСКА ТРПЕВСКА: Македонското здружение на лаборатории и инспекциски тела МАКЛАБ е национална, невладина и непрофитна организација формирана во 2011 година со цел здружување на лабораториите за тестирање и калибрација како и инспекциски тела од нашата држава со следните проектирани цели:

- Меѓусебна соработка помеѓу лабораториите и инспекциските тела

- Споделување искуства и достигнувања со цел унапредување на квалитетот и компетентноста

- Промоција на ефективно тестирање, калибрација и контрола

- Промовирање на акредитацијата како потврда на компетентноста на лабораториите и инспекциските тела

- Размена на искуства и информации преку организирање на семинари, стручни предавања, работилници и конференции

Од 2013 година МАКЛАБ е член на Европската социјација на лаборатории за тестирање ЕУРОЛАБ, а од 2015 на Европската асоцијација на лаборатории за калибрација ЕУРОКАЛ.

Лабораторијата на „Технолаб“, која беше и иницијатор за формирањето на МАКЛАБ е една од првите членки на ова здружение, а членови се и лаборатории за тестирање и калибрација како и инспекциски тела од различни области: заштита на животна средина и заштита при работа, фармацевтска индустрија, експлоатација на руди, медицински лаборатории, прехранбена индустрија, испитување на материјали, геомеханички испитувања, криминалистика, заштита од јонизирачко зрачење, тестирање на возила, испитување на земјоделски производи и други области.

 

Активностите на МАКЛАБ генерално се насочени кон промоција и унапредување на системите за квалитет преку одржување, развој и надградба на компетнтноста на лабораториите и инспекциски тела во Македонија и пошироко.

Во текот на своето постоење МАКЛАБ интензивно работи на исполнување на своите цели преку организирање обуки, семинари, стручни предавања и конференции. На обуките до сега учествуваа над 700 претставници од лабораториите и инспекциските тела, а на конференците „Квалитет и компетентност“ организирани секоја втора година од постоењето на МАКЛАБ (2013, 2015, 2017 и 2019година ) имаше повеќе од 400 учесници од Македонија, регионот и пошироко од Европа.

Од основањето МАКЛАБ е редовен учесник на конференциите што ги организира хрватското здружение на лаборатории КРОЛАБ, со кој имаме потпишано меморандум за соработка, како и на редовните годишни собранија на ЕУРОЛАБ. Оваа година јас, како претседател на МАКЛАБ присуствував и имав свое обраќање на Генералното собрание на Еуролаб кое се одржа во Рим под покровителство на Италијанската асоцијација на лаборатории АЛПИ.

 

МАРИЛИ: Вие сте воедно и генерален менаџер и основач на „Технолаб“ која постои повеќе од 20 години и е една од најстарите лаборатории од ваков вид во државава. Која е основната дејност на компанијата?

ТРАЈКОВСКА ТРПЕВСКА: За „Технолаб“ сум пишувала повеќе пати во вашиот часопис. Во оваа прилика на кратко само да споменам дека „Технолаб“ е приватна компанија основана во 2000 година со цел унапредување на квалитетот на животната и работната средина преку изработка на проекти, но и со неопходна подршка на лабораториски испитувања на медиумите и областите на животната и работната средина.

Своите активности „Технолаб“ ги извршува преку следните 5 сектори:

- Консалтинг во животна средина

- Консалтинг за безбедност и здравје при работа

- Акредитирана лабораторија за тестирање во животната и работната средина (теренска и аналитичка)

- Акредитирано инспекциско тело за контрола во животната и работната средина

- едукативен тренинг центар

Секторот за консалтинг во животна средина изработува:

-     Студиии за влијание врз животната средина

-     Стратегиски оценки на влијание врз животната средина

-     Апликации за добивање дозволи за А и Б еколошки дозволи

-     Елаборати за заштита на животната средина

-     Мониторинг на медиумите во животната средина ( воздух, вода и почва)

-     Изработка на стручни и научни проекти од областа на заштита на животната средина (Катастри на загадувачи на животната средина, Планови за подобрување на квалитетот на медиумите на животната средина, Елаборати за влијанието на домашните ложишта врз квалитетот на амбиентниот воздух и др.)

-     Планови и програми за управување со отпад

Секторот за безбедност при работа нуди услуги за:

- Проценка на ризик на работни места со Изјава за безбедност

- Обука на вработените за безбедност и заштита при работа

- Тестирање и контрола на опрема за работа

- Мерења и анализи на услови во работна средина

- Инспекција и тестирање на заземјување и електрична инсталација

- Изработка на студии (стручни документации) за остварување на право на стаж на осигурување со зголемено траење (бенифициран стаж)

- Проекти и елаборати за безбедност при работа и Планови за безбедност при работа

Лабораторијата на „Технолаб“, како неопходна подршка на претходно споменатите сектори е првата акредитирана лабораторија во нашата држава за испитувања на квалитетот на животна и работна средина согласно меѓународниот стандард MKC ISO/IEC 17025:2006. Акредитирана е од 2008 година. Нашата лабораторијата се состои од теренска и аналитичката лабораторија. Компетентните тимови во состав на аналитичката и теренската лабораторија ги вршат следниве услуги:

- Тестирања и анализи во животната и работната средина

- Мерење и мониторинг на загадувачки супстанции во воздух, вода и почва

- Контрола на квалитет на воздух

- Мерења на услови во работна средина (микроклиматски услови, физички и хемиски штетности)

- Анализи на површински и подземни води

- Категоризација и карактеризација на отпад и отпадна мил

- Испитувања за присуство на ПХБ во воздух, вода, почва и отпадни масла

-Испитување за присуство на БТХ во воздух, вода, почва и одпад.

Во периодот до денес лабораторијата на „Технолаб“ секоја година позитивно е оценувана од страна на Институтот за акредитација на Република Македонија во текот на редовните годишни надзори. Исто така, во овој период успешно поминавме и три редовни надзори за ресертификација на лабораторијата од кои особено сме горди на последниот во декември 2016 година во текот на кој лабораторијата на „Технолаб“ беше успешно оценета во однос на имплементацијата на најновото техничко упатство за мерење на емисии во воздухот од стационарни извори  МКТС CEN/TS 15675:2009. Притоа, „Технолаб“ стана првата акредитирана лабораторија за тестирање во Македонија согласно ISO 17025 со акредитирани методи кои ги задоволуваат барањата на техничкото упатство за мерење на емсиии од стационарни извори МКТС CEN/TS 15675:2009/CEN/TS 15675:2007.

Во лабораторијата на „Технолаб“ имплементирани се над 90 акредитирани методи за испитувања на медиумите и областите на животната средина и испитувања во работна средина. Тестирањата се извршуваат од страна на компетентен и високо стручен персонал. Лабораторијата располага со опрема за земање мостри и вршење анализи на медиумите и областите на животната средина која е високо квалитетна и ги следи најновите технологии во оваа област. Во изминатиот период значитено инвестиравме во нова опрема во теренската лабораторија која е особено специјализирана за мерење емисии на загадувачки супстанции од стационарни извори.

Секторот инспекциско тело акредитирано согласно MKS EN ISO/IEC 17020:2006 врши контрола на услови во животна и работна средина во согласност со соодветната законска регулатива.

Во рамките на едукативниот тренинг центар „Технолаб“ нуди стручни обуки од областа на БЗР, експертски обуки за стручно оспособување на стручните лица за безбедност при работа и експертски обуки за управување и постапување со отпад.

 

МАРИЛИ: И покрај бројните кризи и предизвици со кои се соочуваме во изминатиот период, грижата за зачувување и заштита на животната средина останува главен приоритет на нашето општество. Оттаму, каква е улогата на „Технолаб“ во таа насока?

ТРАЈКОВСКА ТРПЕВСКА: Грижата за зачувување и унапредување на животната средина од секогаш била прв приоритет во нашето работење без разлика на предизвиците со кои се соочуваме во изминатиов период. Предизвикот да се биде пионер и лидер во областа во која делува компанијата „Технолаб“ е мојата секојдневна движечка енергија особено затоа што заштитата на животната средина и безбедноста при работа е од исклучителна важност за сите!

Позицијата која ја имам само ја зголемува мојата индивидуална општествена одговорност но и колективната одговорност што ја има „Технолаб“ како компанија која работи во областа на заштита на животната средина и безбедност при работа. „Технолаб“ со својот стручен и компетентен тим целосно е посветен на спроведување на дефинираната стратегија за инвестиции во сопствените ресурси преку константен развој и усовршување на персоналните квалитети и техничко опремување во согласност со најновите технологии. Ова, секако претставува предуслов за осигурување на квалитетот, но и влог за остварување на нашата визионерска цел – секогаш да сме лидери во областа на заштитата на животната средина. Истовремено, нашата мисија е да дадеме придонес кон утврдување на професионалната и интелектуална свест за неопходноста од оптимален квалитет на животната средина во која живееме и безбедната работна средина во која работиме, затоа што животната и работната средина не само што се заеднички за сите, туку се и наследство за идните генерации.

Лидерската улога на „Технолаб“, исто така, подразбира и континуиран развој и унапредување на квалитетот на услугите кои ги нудиме и препознавање на барањата на клиентите, со цел да дадеме навремен, квалитетен и компетентен одговор.

Во изминативе над две децении успеваме да ја следиме нашата визија, а осигурениот квалитет и утврдената и препознатлива компетентност ни дава за право да очекуваме дека во следниот период ќе бидеме уште подобри. 

 

МАРИЛИ: Колку компанијата ги следи современите текови на примената на екологијата и дали нашето општество напредува на овој план, дали ни се подостапни европските и светските искуства, но и директни фондови и инвестиции што ќе ни помогнат во зачувување на животната средина?

ТРАЈКОВСКА ТРПЕВСКА: Доколку „Технолаб“ не ги следеше сите светски современи текови и стандарди во примената на најновите достигнувања во заштитата на животната средина, немаше повеќе од две децении успешно да опстојува на бизнис- сцената која не трпи импровизации и манипулации. Така, дури и во претходните две кризни година заради светската пандемија со Ковид-19, а потоа и со сегашнава состојба со енергетската криза, наоѓаме начини и можности да инвестираме како во знаење, така и во набавување нова опрема во лабораториите на „Технолаб“, со цел да останеме лидер во областа на нашето делување - заштита и унапредување на животната средина и безбедноста при работа. Лидерската улога на „Технолаб“ подразбира континуиран развој и унапредување на квалитетот на услугите кои ги нудиме на нашите клиенти во Република Северна Македонија но и пошироко во регионот, а со цел да дадеме навремен, квалитетен и целосен одговор на барањата на нашите клиенти.

Константно сме во тек со најновите информации и глобални трендови, а знаеме дека денес најважна од се`е информираноста. Според мое лично мислење, нашето општество прави големи напори да држи чекор со поголемите земји во однос на сите промени и нови еколошки предизвици што секојдневно се појавуваат со брзина на светлината. И со право, затоа што животната средина мора да си го добие заслуженото место на листата на приоритети на планетава и затоа што сите ние сме одговорни за тоа како ќе изгледа нашата животна и работна средина. За тоа да се случи, потребни се уште бројни големи, коренити промени во нашиот став кон околината во која живееме и работиме. Европските искуства во однос на оваа проблематика ни се релативно достапни, но треба да се стави акцент и на оние надвор од континентов, од кои можеме навистина доста да научиме. Заштитата на животната средина не е акутен проблем, туку еден долготраен процес за кој се потребни силни ресурси, висока професионалност и цврста решеност да се истрае тогаш кога силите на природата и не се на ваша страна.

 

МАРИЛИ: Вие сте една од 10-те најуспешните жени менаџери во нашата земја, бевте добитник на признание од агенција „Марили“ во 2018 година, а во 2021, по повод  25-годишниот јубилеј на „Марили“ го добивте признанието „Жена водилка“. Кажете ни што, според Вас како жена, е најважно во градењето сопствен приватен бизнис кој опстојува и се развива во континуитет?

ТРАЈКОВСКА ТРПЕВСКА: Во текот на мојата кариера сум била почестена со добивање голем број вредни признанија, пофалници и благодарници. Сите ми се важни и многу ми значат - не како основа за себепромоција во јавната сфера, туку најмногу како иницијална каписла за сите мои идни професионални планови и ангажмани. Со својот минат труд сметам дека сум ја потврдила својата професионална заложба, која сакам уште повеќе да се развива и да вроди со нови плодови. Бизнис секторот во нашава држава навистина содржи висококвалитетна конкуренција, каде што сите обиди за „провлекување“ и несериозност во работата бргу заминуваат на буништето на неуспешноста.

Лесно е да се качите на врвот, уметноста е во тоа таму и да се задржите. Сатисфакцијата е уште поголема кога меродавни институции и тела ќе ви докажат дека го почитуваат вашиот вложен труд и многу непроспиени ноќи во име на општото добро.Затоа, секое ново признание за мене претставува сјајно огледало на се она што сум го вложила во својата едукација и работа, но и сериозен патоказ за раскрсницата на животот. Инаку, не за мене како жена, туку за мене како личност (не прифаќам поделби на машки и женски лидери), најважно во градењето сопствен бизнис е следењето на една однапред зацртана визија, презентирањето на исклучителна коректност и доследност во работата, како и почитувањето на желбите и потребите на сите актуелни и потенцијални клиенти. Не смеам да го заборавам својот тим, прекрасниот тим на „Технолаб“, кој заедно со мене е подеднакво заслужен за сите скалила по кои мојата компанија се искачи во текот на изминативе 22 години и секако поддршката на моето семејство.

 

МАРИЛИ: Што сметате дека е најважно за да се воспостави баланс меѓу професиналните и приватните обврски, со оглед дека сте сопруга и мајка?

ТРАЈКОВСКА ТРЕПЕВСКА: Во денешно време е многу тешко да се стави остра граница помеѓу професионалните и приватните обврски, особено кога се работи за приватен семеен бизнис каде секој член од семејството директно или индиректно учествува и дава свој придонес во секојдневните обврски и планирани активности. Можам да кажам дека сум среќна што имам комплетна и недвосмислена поддршка од моето семејство, што за мене може да значи само уште поголем стимул и инспирација. Голем дел од моето секојдневие се „употребува“ на работното место, каде што активно и посветено се вложувам себеси, понекогаш и повеќе одошто сум мислела дека можам, бидејќи јас само на тој начин умеам професионално да егзистирам. Не размислувам многу околу балансот меѓу приватните и професионалните обврски, зашто јас него го живеам веќе две децении, се надевам - успешно. Се разбира дека кога се враќам во смирената енергија на мојот дом јас се трансформирам во сопруга и мајка, која сака и понешто убаво да зготви за семејството или да сподели интересни информации за она што се случувало во текот на денот. Вечерните прошетки со сопругот, заедничките викенди покрај езеро или на планина се нешто што секогаш ми ги полни батериите, уживам во релаксираната атмосфера што тогаш владее меѓу нас двајцата. Но, неретко знам работата да ја донесам и дома - е тогаш навистина треба добро да се избалансирам, зашто ако не поставам граници, се случува да претерам, работејќи до доцните ноќни часови.   

 

МАРИЛИ: Колку е важно жената да знае да го пронајде вистинскиот начин за релаксирање и обновување на својата животна енергија, особено кога е ангажирана како менаџер во бизнисот, но и одговорна за своето семејство?

ТРАЈКОВСКА ТРПЕВСКА: Љубовта е вечен акумулатор на енергија, а јас ја давам и примам во неограничени количества. Таа ми ја регенерира целосната ментална и физичка структура, ми нуди насмевка кога ми е тешко и мирно пристаниште кога сум уморна. На работа понекогаш се соочувам со стресни ситуации и навидум ненадминливи пречки, но свесна сум дека живееме во време исполнето со бројни предизвици, каде што успеваат само силно мотивираните и добро едуцираните.

Според законите на природата енергијата е постојана, само може да го менува својот облик..Така и мојата сопствена енергија ја добивам од моите секојдневни животни предизвици и успеси – индивидуални или професионални. Секој поединечен успех за мене е нова доза на енергија која ја користам за достигнување на новиот предизвик. Оваа движечка енергија е моја инспирација за достигнување нови нешта, за учење нови досега неосознаени нешта и за креирање нови визии за иднината. Во секторот во којшто јас работам, ова сознание е навистина од круцијална важност.

Од друга страна, моето семејство, впрочем, како и сите македонски семејства, има свои полесни и потешки патеки кои требало да ги изоди. Одговорноста за се, она што сте го создале како семејство воопшто не е занемарлива, потребни се навистина многу „истрчани километри“ за да се дојде на целта со што помалку повреди и модринки. Но, на крајот на денот, не е важно колку пати сме паднале, туку колку пати сме се подигнале и продолжиле понатаму. А, сила за сето тоа јас црпам од чистата, исконска љубов кон моите најмили и мојот „Технолаб“.

 

 

---

Статијата е прочитана 995 пати.

Сподели:

---