П.И.К.Ко Македонија - повеќе од 20 години партнер од доверба во прехранбената индустрија
Интервју со Викторија Шотароска Трајкова, генерален менаџер на П.И.К.Ко Македонија и регионален менаџер за П.И.К.Ко Косово и П.И.К.Ко Албанија. Шотароска Трајкова говори за дведецениското искуство на компанијата во Македонија, нејзиното успешно работење, и пребродувањето на повеќеслојните кризи од изминатите три години. Шотароска Трајкова во интервјуто зборува и за тоа што е потребно и како е да се биде жена менаџер и приватно исполнета жена.
МАРИЛИ: П.И.К.Ко ДООЕЛ Македонија како дел од интернационалната групација П.И.К.Ко АД која е застапена во повеќе држави на Балканот е една од најбрзорастечките иновативни компании во областа на трговија со суровини во сите области од прехранбената индустрија. Кажете ни, од кога постоите и со што се занимавате?
ШОТАРОСКА ТРАЈКОВА: Компанијата П.И.К.Ко ДООЕЛ Скопје како дел од групацијата П.И.К.Ко АД со седиште во Софија во Бугарија, за прв пат е регистирана на македонскиот пазар во 2001 година, така што веќе белeжиме над 20 години успешно работење.
Главната дејност е трговија со суровини и функционални додатоци од сите области на прехранбената индустрија. Соработката со реномирани светски производители на суровини за кои сме официјални претставници/дистрибутери за пазарите во регионов во сиве овие години наназад, наметна едно ново, динамично, разнообразно и професинално развивање на прехранбениот сектор.
Горди сме што сме дел од тој развој и горди сме што нашите клиенти гледаат во нас партнер од доверба на кој можат безгрижно да се потпрат.
МАРИЛИ: Дали во континуитет ја надополнувате листата на вашите суровини во портфолиото и кој е главниот критериоум и услов за избор на истите?
ШОТАРОСКА ТРАЈКОВА: Во нашето портфолио има над 2.000 видови на суровини кои во континуитет ги поддржуваме на лагер во нашиот магацин. Секако портфолиото се менува според потребите на пазарот и актуелноста на различни ставки. Со цел да бидеме атрактивен доставувач на суровини и да ги следиме потребите на локалните производители, задолжително нашето портфолио го надополнуваме со нови суровини, а особено функционални додатоци кои се важни за следење на светските трендови.
Најновите случувања и трендови ги следиме благодарение на сите информации кои ги добиваме од нашите партнери производители на суровини, посета на светски саеми каде што има производители од цел свет и каде што се претставуваат сите иновации, како и според барањата на нашите клиенти. Секогаш сме среќни и горди кога ќе успееме да помогнеме во иновирање на некој производ кај клиентите како и подобрување на крајните својства на истите и добивање на додадена вредност.
МАРИЛИ: На кои пазари во регионот и пошироко сте присутни и каква е вашата флексибилност во делот на дистрибуција на производите?
ШОТАРОСКА ТРАЈКОВА: Компанијата е интернационална со главно седиште во Софија Бугарија. Матичната фирма е основана во 90-тите години што значи дека е присутна на бугарскиот пазар повеќе од 30 години. По десетина години од нејзиното успешно работење и развивање, истата решава да се прошири регионално, па така во 2001 година е основана П.И.К.Ко Македонија.
Нашата успешна Македонска приказна сакавме да ја пресликаме и пошироко и да излеземе од нашите граници, па така во 2005та година ја отворивме канцеларијата во Косово, а во 2013 ја отворивме П.И.К.Ко Албанија во Тирана.
Двата пазари Косово и Албанија во целост односно комерцијално, финансиски и логистички се подржуваат од тимот на П.И.К.Ко Скопје.
Нашата компанија постои исто така со свои канцеларии и магацини во Србија и Романија, тие два пазари се под целосна контрола на матичната фирма.
Поради големината на компанијата апсолутно неопходно е сите процеси да се интерни, така да и логистиката како алка во целиот синџир е една од најважните која го подржува беспрекорното реализирање на сите увози и извози.
МАРИЛИ: Колку тимот на П.И.К.Ко успеа да се трансформира и прилагоди на актуелните кризи и дали новите производи значат успешно менаџирање во кризни услови?
ШОТАРОСКА ТРАЈКОВА: Флексибилноста во работењето е еден од водечките и основни карактеристики во работењето на една компанија. За овие 20 години поминавме низ премногу предизвици, најверојатно низ сите тие предизвици и низ целиот тој процес на фокусирање за пронаоѓање на решенија на сите проблеми, толку многу се исчеличивме што претходните три години, професионално и исправено ги пребродивме.
Флексибилноста која ја споменав е клучниот и најважен фактор, во целиот тој изминат период кога голем предизвик беше снабувањето на стоката од далечниот исток ние моравме да пронајдеме алтернативни решенија за брза и квалитетна испорака на суровини од поблиските краишта, поради умешното и домаќинско работење во подобрите времиња, успеавме да ги пребродиме и финаскиските премрежја кои доаѓаа од драстичното покачување на цената на суровините, потоа енергетската криза, падот на производството кај повеќето од производителите, а со тоа и намалувањето на побарувачката на суровини.
И тековнава година ја гледаме како година на голем финансиски предизвик, но ги превземаме сите мерки и тековно ја следиме целокупната ситуација со цел да превземеме соодветни и брзи решенија. Најважно од се продолжуваме да сме поткрепа на нашите клиенти како сериозен, лојален и професионален доставувач, а секако очекуваме и бараме соодветен однос од нивна страна со цел продолжување на успешната соработка.
МАРИЛИ: Дали и колку вложувате во Вашите вработени, во смисла на нивно доусовршување, разни обуки, семинари...?
ШОТАРОСКА ТРАЈКОВА: Човечките ресурски се најважните ресурси на било која компанија во било кој сектор, без разлика дали компанијата има автоматизирани или полуавтоматизирани процеси, човечкиот фактор е едноставно главниот фактор за успех.
Земајќи го предвид погоре посоченото, едноставно инвестицијата во вработените е неминовна и најнеопходна. Ние имаме обуки и учествуваме во различни програми за обучување на вработените, обуки за продажни вештини, обуки за меки вештини кои ја подобруваат комуникацијата, со клиентите и доставувачите, а со тоа се подобруваат и преговарачките вештини, обуки за емпатија и емоционална интелегенција, обуки за менаџирање на време, обуки за секторот логистика, како и посета на задолжителни предавање и информативни сесии за самиот оддел, обуки и посета на семинари за финасии. Тоа значи, за секој сектор и за секој оддел, задолжително надоградување на годишно ниво.
Комерцијалниот сектор како движечки сектор во нашата фирма, задолжително ги посетува сите работилници и обуки, организирани од нашите доставувачи со цел следење на новитетите, како што претходно наведов посета на светски саеми каде што се следат сите иновации.
МАРИЛИ: Каде се наоѓа денес прехранбената индустрија во земјава споредено со регионот имајќи ја предвид глобалната криза која силно го погоди овој сектор од македонската економија?
ШОТАРОСКА ТРАЈКОВА: Кризата навистина имаше значителен негативен инпакт врз работењето на компаниите во секоја област. Во ковид кризата истите се соочија со една категорија на проблеми како што беше недостатокот на суровини поради забавеното испорачување на истите од сите страни на светот, за минатата година таа кризна состојба да добие навистина сериозен замав, главна причина за екстремно тешките услови на работење беше енергетската криза.
Драстичното покачување на цените на енергенсите на берзата предизвика повеќе од десеткратно покачување на цената на струјата. Во целиот овој период на драстичен раст на цената на електрична енергија, некои од компаниите ги изгубија потпишаните договори и преминаа на слободен пазар и истите беа сериозно засегнати. За жал, нашата влада не успеа да го заштити стопанството со фиксирање на цената како што тоа го направи за домаќинствата и ја фиксираше истата.
За разлика од нашиот пазар, на соседните пазари, конкретно во Косово и Србија, тоа не беше случај и тамошното стопанство работеше со фиксна цена, и со тоа компаниите кои во исто време се и конкуренти на нашите производители, котираа одлично во однос на конкурентноста на нивните цени.
Субвенциите и поддршката се навистина важни и одлуките што се носат од страна на властите треба да бидат издржани и логични, а не популистички.
Истите исклучиво треба да се во консултација со бизнис секторот, во целост потпомогнати од стопанските комори како медијатори помеѓу едната и другата страна.
МАРИЛИ: Кои се Вашите согледувања околу тоа кои сектори од прехранбената индустрија можат во иднина најбрзо да се развиваат за да не биде државата толку увозно зависна од храна?
ШОТАРОСКА ТРАЈКОВА: Постојано се повторува дека Македонија е земјоделска земја, но за жал и покрај фактот што ги имаме сите услови за развој на земјоделие, плодна почва, голем број сончеви денови, доволно вода, тие услови не се искористени и кај нас се одгледуваат количински многу малку земјоделски култури, почнувајќи од житата како најважни, потоа зеленчук и овошје.
Прехранбената индустрија за жал е во премногу голем процент зависна од увозни суровини, особено од основните житни култури.
Исто така многу сме зависни и од свежо месо од кое потоа треба да се прават преработки во месната индустрија, згора на тоа, и покрај немањето локални кланици кои би требало да ги задоволат потребите од свежо месо на пазаров, владата има воведено високи царини за увоз на свинско замрзнато месо, и на таков начин локалните производители имаат дополнителни трошоци при увоз и истите тешко успеваат да конкурираат со крајните производи во регионот, каде што извезуваат.
Со идентичен проблем се соочува и млечната индустрија, земајќи ја предвид статистиката дека бројот на говеда (крави) е намален за повеќе од 20% во 2021 во однос на 2020 година. Млечната индустрија навистина се соочува со сериозен дефицит на свежо млеко, и истото мора да го надополнува од соседството што го прави нивниот производ крајно неконкурентен на пазаров и при извоз на локалните пазари. Државата треба сериозно да се позанимава со оваа проблематика од која сериозно зависи успешноста на прехранбениот сектор во секоја област.
МАРИЛИ: Вие сте една од најуспешните жени менаџери во нашата земја, но колку интернационалното искуство Ве исполнува професионално, колку е напорен Вашиот работен ден и како успевате да ги наполните батериите во слободните мигови?
ШОТАРОСКА ТРАЈКОВА: Еден од најважните улови за успешност е љубовта кон работата, но колку и да звучи како клише, навистина, доколку си исполнет со тоа што го работиш успехот е неминовен.
Јас сум навистина среќна што работам во компанија што ми дава можности за раст и развој, но, да бидам искрена, самиот успех најмногу доаѓа од личната мотивација, самоиницијативност, посветеност и вистинска желба за напредок, професионален и личен.
Бидејќи во компанијата сум од самите почетоци, ги имам креирано скоро сите процеси и сама имам поминато низ истите, така што со текот на годините и напорно работење доаѓа и искуството. Многуте задачи и обврски сега ми се рутина.
Она што ми е најважно, е да бидам што е можно поиновативна во тековното работење како и да се посветам на младите и нови кадри во фирмата и во целост да го пренесам моето знаење и искуство.
Се трудам да бидам лидер-ментор и на тој начин да создаваме подобра и постабилна иднина за сите нас.
Јас сум сопруга, мајка, сестра, тетка и пријателка во исто време, сакам да креирам весел и интересeн ден за моите најмили во слободното време и на тој начин целосно се исполнувам со позитивна мисла и енергија.
Статијата е прочитана 2075 пати.
Видео: Избор на најуспешни жени мејаџери 2022
