Интервју со Слободанка Цока Стевиќ - „Кондор - ТИС“ ДОО од Србија со атрактивни летни туристички понуди и можност за алтернативен туризам во хотелот „Хеба“ во Дивчибаре
Интервју со Слободанка Цока Стевиќ, сопственичка и генерална менаџерка на туристичката компанија „Кондор ТИС ДОО“ од Р. Србија, која постои повеќе од две децении. Компанијата вклучува две туристички агенции, во Лозница и во Белград, како и сопствен хотел во Дивчибаре со скијачки парк, кој нуди многу семејни и активности за деца и млади, автентично гастрономско искуство и прекрасна природа.
Туристичките агенции се специјализирани за детски и младински туризам, организација на патувања и сместување во хотели, луксузни и ексклузивни аранжмани за комплетирање на корпоративни патувања.
„Во сè што правиме, се трудиме да останеме доследни - квалитетот, топлината и довербата се основа на сè“, вели Стевиќ.
Слободанка Цока Стевиќ е овогодишна лауретка, прогласена за една од најуспешните жени менаџери од земјава и регионот на манифестацијата „Избор на најуспешни жени менаџери“ 2025, во организација на агенција „Марили“. Стевиќ беше и една од панелистите на „Марили Бизнис Форум“ 2025 година, кој беше посветен на туризмот и се одржа во мај, годинава.
МАРИЛИ: Почитувана Цока, македонската јавност неодамна Ве запозна кога бевте наградени како една од најуспешните жени менаџери на настанот - „Избор на најуспешни жени менаџери“ во регионот, организиран од агенцијата „Марили“ од Скопje. Што значи оваа награда за Вас и колку се важни, според Вас, ваквите проекти што ги охрабруваат жените во бизнисот?
СТЕВИЌ: Секоја награда што сум ја добила досега има посебно место во моето срце. Оваа награда има посебно значење за мене бидејќи доаѓа надвор од границите на мојата земја, а токму ваквите признанија потврдуваат дека вредноста што ја градам е препознаена и ценета и во регионот. Дојде времето кога гордо ги сумирам годините работа, предизвици и развој.
Особено сакам да ѝ се заблагодарам на г-ѓа Лидија за љубезните зборови, емоциите и искуството што го носам од оваа средба, бидејќи зад секоја награда стојат луѓе кои ја прават уште повредна.
Секој проект што ги поддржува жените и им дава простор да ги споделат своите приказни е чекор напред за целото општество. Да се биде жена во бизнисот значи постојано балансирање помеѓу очекувањата, одговорностите и сопствените соништа. Не е лесно, затоа иницијативите како оваа се вредни затоа што тие инспирираат, поврзуваат и ни кажуваат дека сите имаме сличен пат на развој, дека е тешко, но и многу можно.
МАРИЛИ: Бевте дел од „Марили Бизнис Форумот“ 2025, кој беше посветен на туризмот. Кои се Вашите размислувања за можностите за регионално поврзување на туристичката понуда, како и за можноста за зголемување на фреквенцијата на странски туристи преку таканаречените Балакански тури?
СТЕВИЌ: Верувам дека Балканот има огромен потенцијал кој штотуку почнува да се открива во поширока туристичка смисла. Нашите земји споделуваат многу работи: традиција, гостопримство, автентична кујна и искрени луѓе.
Регионалното поврзување не е само можност за повеќе туристи - тоа е можност за размена на искуства, комбинирање на интереси, поврзување на дестинации, автентични локални приказни, специфични вкусови и културно наследство. Верувам дека заедничките настапи на саеми, промоции, тематски фестивали и регионални настани го отвораат патот за поголема видливост и одржлив раст на туризмот.
Балканските тури можат да станат еден од најбараните европски туристички услуги - со добра логистика, синергија и промоција преку заеднички вредности.
МАРИЛИ: Вашата туристичка компанија Кондор ТИС Д.О.О. опфаќа неколку сегменти. Кажете ни накратко, кои услуги ги нудите?
СТЕВИЌ: „Кондор ТИС“ е компанија која гради приказни повеќе од две децении. Таа порасна со мене. Денес, таа вклучува две туристички агенции - во Лозница и Белград, сопствен хотел во Дивчибаре (Хотел Хеба) со скијачки парк. Специјализирана за детски и младински туризам, организација на патувања и сместување во хотели, луксузни и ексклузивни аранжмани за комплетирање на корпоративни патувања.
Во сè што правиме, се трудиме да останеме доследни - квалитетот, топлината и довербата се основа на сè.
МАРИЛИ: Која е најактуелната летна туристичка понуда што ја нудат Вашите туристички агенции?
СТЕВИЌ: Ова лето, акцентот е ставен на семејни патувања во природа, камп програми за деца и млади и одмори на домашниот пазар со гастро-ено концепт. Како и секоја година, забележуваме голем интерес за Црна Гора, Охрид, Грција, Египет, Турција, Кипар, Шпанија, Италија...Гостите се сè повеќе љубопитни, сакаат повеќе од сместување. Сакаат да истражуваат, да запознаваат нови култури и да доживуваат приказни не само напишани во водичи и брошури, тукуи да создаваат спомени што ќе ги паметат засекогаш, бидејќи патувањето го менува нашиот поглед на светот.
МАРИЛИ: Oрганизирате ли патувања на егзотични дестинации и дали имате свои автентини понуди кои се Ваши ексклузиви, а со кои привлекувате и патници од Македонија и регионот?
СТЕВИЌ: Да, имаме таква понуда - но на внимателно одбран начин. Ова не се масовни тури, туку специјално дизајнирани патувања за оние кои сакаат нешто поинакво.
Меѓу егзотичните дестинации ги издвојуваме Маврициус, Малдиви, Тајланд, Мароко, Куба, Доминиканска Република, Сејшели...
МАРИЛИ: Од кога постои и работи хотелот „Хеба“ на Дивчибаре? Какви уникатни искуства нудите, особено во летниот период?
СТЕВИЌ: Хотелот „Хеба“ работи од 2015 година и се наоѓа во срцето на Дивчибаре, опкружен со природа, лесни патеки за нежност и авантура, борова шума, блиски видиковци, нуди тишина за одмор, книга и разговор.
Во лето нудиме активности што го следат духот на планината - водени прошетки, подготовка на традиционални јадења, логорски оган со музика, традиционални настани: „Денови на печурки“ кој ги собира љубителите на природата од целиот регион, X уметничка колонија „Мојот агол“, детски музички фестивал „М клуб“.
МАРИЛИ: Дали планирате проширување на капацитетите и какви се визиите за иднината?
СТЕВИЌ: Планираме да го прошириме сместувачкиот капацитет во хотелот „Хеба“ и да ги прошириме тематските содржини за деца и семејствата. Постои и можност за понуда на нови дестинации. Во следната фаза, сакам да го поврзам туризмот со одржлив развој, здрава исхрана и регенеративни концепти и да го направам престојот на планина повеќе од одмор. Сакам тоа да биде еден вид враќање кон себе.
МАРИЛИ: Како успешна жена менаџер, што мислите дека е најважно за континуитетот и развојот на бизнисот?
СТЕВИЌ: Доследност, квалитет, посветеност, верба во она што го правите, дури и кога е тешко. Исто така, важна е и подготвеноста за учење и промена, но никогаш да не го промените она што ве прави тоа што сте. Жената менаџер мора да знае како да води и со авторитет и со емпатија.
Најважно е да останете човек, а потоа и лидер.
МАРИЛИ: Како успевате да најдете време за себе и покрај динамиката на вашата работа? Што ја релаксира Слободанка Цока Стевиќ во слободното време?
СТЕВИЌ: Имам многу енергија, но исто така научив дека не е луксуз кога ќе кажете „ми треба мир“.
Прошетката во природа, тишината рано наутро, книгата и смеењето со драги луѓе ме опушта. Морам да признаам дека во мојот ум се создаваат нови идеи.
И да бидам искрена, сакам да патувам лежерно, да истражувам места на кои ниту улиците не ги познавам, но да знам дека сум добро.
Статијата е прочитана 174 пати.
Видео: Избор на најуспешни жени мејаџери 2022
