Вкусот на производите на „Бучен Козјак“ поврзува генерации потрошувачи
Интервју со Наташа Денковска Бојковски, генерален менаџер на „Бучен Козјак“ – Куманово. Денковска Бојковски говори за 40-годишниот успех на компанијата, за исклучителниот квалитет на производите и како да се опстои за време на кризи. Генералната менаџерка говори и за сопствените искуства, што се е потребно за жената во бизнисот да може да напредува, за мотивацијата и поддршката од семејството. Денковска Бојковски вели дека типично за „Бучен Козјак“ е тоа што жените се дел од сопственичката и управувачката структура, но се застапени и на многу од раководните позиции.
МАРИЛИ: „Бучен Козјак“ е препознатлив бренд во македонската млечна индустрија веќе 40 години. На што се должи долгогодишното успешно постоење и што ја одвојува оваа млекарница од конкуренцијата?
ДЕНКОВСКА БОЈКОВСКИ: Уште од создавањето на млекарницата, основачите имале јасно поставена мисија - компанијата, која е водич низ долгогодишното работење веќе четири децении, „да произведува традиционални млечни производи со висок квалитет“ што со својот вкус поврзуваат генерации потрошувачи.
Наша најголема вредност се вработените и богатото долгогодишно искуство во создавањето и развојот на брендот. Поврзувањето на традиционалниот начин на производсво и задоволувањето на барањата на потрошувачите токму за такви млечни производи, нѐ издвојува и нѐ прави препознатливи на пазарот.
МАРИЛИ: Млекарницата е синоним за производство на киселомлечни производи. Какви се производи излегуваат од погоните на „Бучен Козјак“ и од каде ја набавувате суровината, каква е соработката со млекопроизводителите?
ДЕНКОВСКА БОЈКОВСКИ: Во асортиманост на производи водечка улога во производството и во продажбата има јогуртот, кој навистина е синоним за „Бучен Козјак“ и генерално прва перцепција од потрошувачите за компанијата. Како дел од таа програма е и пробиотскиот јогурт што последниве три години бележи континуран и стабилен раст во продажбата.
Киселите млека (и кравјото и овчото) кои се типични традиционални производи препознатливи за потрошувачите со кајмакот на површината на производот, се издвојуваат на пазарот. Не заостанува и тврдата програма што сѐ повеќе зазема пазарно учество во продажбата, бели сирења - кравјо, мешано и овчо, жолти сирења и кашкавал. Најнов производ е трајното млеко со 3,2 % масленост, што веќе ги постигнува проектираните количини за продажба и ги исполнува барањата на потрошувачите.
Суровината се набавува од домашни млекопроизводители со кои имаме воспоставено партнерска и долгорочна соработка. Досега имаме иницирано и реализирано повеќе различни заеднички проекти со фармерите, во насока на унапредување и развој на примарното производство.
Од едукацијата со нашите доктори ветеринари обезбедување опрема за олеснето и поквалитетно работење, финансирање со бескаматни заеми за зголемување на количините на откуп на суровина како потреба од наша страна, а порентабилно и квалитетно работење на кооперантите.
И во иднина се планирани проекти за остварување на поставените стратегии на компанијата од аспект на развој, унапредување и обезбедување квалитетна суровина како основа за производство на висококвалитетни млечни производи.
МАРИЛИ: Енергетската криза многу влијаеше врз зголемувањето на цената на млекото и на млечните производи. Како „Бучен Козјак“ се справува со овој проблем?
ДЕНКОВСКА БОЈКОВСКИ: Последниве две години беа исклучително тешки за сите економски оператори во Македонија и во светот, КОВИД и постковид кризата, сега и енергетска криза имаат огромно влијание врз ценовните шокови и стапката на инфлација што од месец во месец сѐ повеќе се зголемува. Она на што немаме влијание, односно надворешните фактори и опкружување, го балансираме со приспособување на внатрешните политики и стратегии на компанијата за амортизација на влезните параметри и зголемените трошоци на суровините и репроматеријалите, со цените на готовите производи.
Први чекори што се преземени се планови за оптимизација на производните процеси, инвестирање во опрема за генерирање заштеди, проекти за ублажување и намалување на потрошувачката на енергија.
Реализиравме инвестиција во фотоволтаична централа на производвениот погон што задоволува еден дел од потребите на електрична енергија, но, сепак, останува голем процент од потрошувачката на струја што ја набавуваме од слободниот пазар на енергија, каде што цените се движат и до 500 % повеќе од претходно.
Со иста ситуација се соочуваат и млекопроизводителите, а нивното работење стана нерентабилно во однос на набавката на храна што е многу поскапена како резултат на војната во Украина, како и поскапувањето на енергијата, што придонесе за зголемување на откупната цена на суровото млеко за да успеат да опстанат во нивните бизниси.
Како главен инпут во производството, цената на млекото има најголемо влијание врз зголемувањето на цените на готовите производи што ги преработуваме, покрај сите други зголемени трошоци во процесот. Засега цената на енергијата е намалена, но цената на суровините продолжува со трендот на пораст.
МАРИЛИ: Што е пресудно за да напредува жената во кариерата?
ДЕНКОВСКА БОЈКОВСКИ: Жените секогаш го наоѓаат патот до остварување на целта. Потребно е да работиме на себе, да се надградуваме, да го менуваме тоа што ни ја одзема енергијата што е потребна за да се совладаат препреките и искушенијата на тој пат. Суштината е во ставот што го имате, имиџот што го создаваме преку своето работење, знаење, вештини и поставените принципи. Потребно е да се има позитивен став, но и самокритичност, а самомотивацијата е најмоќната алатка што ја поседуваме или создаваме.
Многу е важно да има квалитетни тимови, а нивниот потенцијал да се насочи таму каде што е потребно. Доколку сите имаме иста цел, а тоа е на потрошувачот да му испорачаме квалитетен производ, со продуктивност во процесот на производство и ефикасна продажба, тогаш поединечната енергија се акумулира и станува движечка сила со која се остварува поставената цел.
Од друга страна, пак, и семејството е силен тим доколку се постави така. Без поддршка и разбирање од најблиските, што е голема мотивација, а не пречка, успехот е уште поголем.
МАРИЛИ: Што значи да се биде успешна жена менаџер и колку Вашата позиција Ви остава време за Вашите приватни обврски?
ДЕНКОВСКА БОЈКОВСКИ: Најголеми предизвици со кои се соочуваат жените што сакаат да водат бизнис или се на раководна позиција се стереотипите за улогата на жената во нашето општество, што претставува сериозен обесхрабрувачки фактор. Во врска со овие прашања, моето лично искуство го докажува спротивното - досега во ниеден сегмент од работењето, професионално или приватно, не сум била обесхрабрена или деградирана врз основа на родова нееднаквост.
Факт е дека жените сѐ повеќе се присутни во бизнис-секторот, а за нашата компанија е типично тоа дека жената е дел од сопственичката и управувачката структура. Имено, во „Бучен Козјак“ со голем дел од позициите на различни нивоа на управување раководат жени, а се истакнува нивната партиципација и додадената вредност што ја даваат во градењето и развивањето на компанијата. Всушност, не ги делам и перципирам луѓето на машки и женски пол, само е потребно нивната енергија да се балансира со разбирање за поголема функционалност.
На прашањето дали може да се постави баланс помеѓу приватниот и професионалниот живот, мојот став е дека со добра организацијација и одредување на приоритетите може да се балансираат двата сегмента. Важно е да научите колку што е можно поефикасно да ги извршувате своите работни обврски, а во секое слободно време да сте смирени и посветени на своето семејство бидејќи ништо не е невозможно за оној што има волја за предизвик. На предизвиците не треба да се гледа како проблем и со страв, токму тие не зацврстуваат како личност и нѐ создаваат како лидери на сопствениот живот!
Статијата е прочитана 3358 пати.
Видео: Избор на најуспешни жени мејаџери 2022
