Индивидуалност изразена преку очилата на брендот „Диоптра“
Интервју со Марија Костуранова, генерален менаџер на „Диоптра оптикс“, Скопје во кое зборува за 30-годишниот развој на успешната бизнис приказна за чиј успех говорат и седумте салони со најсовремени оптометриски кабинети и опрема за изработка на оптички леќи од типот 15-минутен сервис, за стручниот и професионален кадар, за индивидуалниот пристап кој овозможува изработка на персонализирани стакла и очила од најреномираниот бренд „Линдберг“. Костуранова зборува и за сѐ она што е потребно за да се биде успешна жена менаџер
МАРИЛИ: „Диоптра оптикс“ одбележува 30-годишен јубилеј на задоволство на Вашите бројни клиенти. Накратко кажете ни како започна оваа успешна бизнис приказна и кои беа најважните фази на развој на брендот?
КОСТУРАНОВА: Неверојатно, но вистинито. 30 години ми летнаа. Приказната „Диоптра“ започна во 1993 година и тоа во услови на војна, ембарга, прекинати соништа и планови за моето заминување во странство по матурирањето во Загреб. Моја девиза секогаш било дека сѐ е со причина и секое лошо е за подобро. Така излезе и со брендот „Диоптра“, кој на сите предизвици и тешкотии стануваше се појак и подобар. Со право може да кажеме дека сме лидер во оптичката бранша, не само во државата, туку и во регионот. Нашиот салон „Диоптра Котур“, на плоштад, во склоп на хотел „Мериот“ е прогласен за една од најубавите и најголемите оптики во светот. Мило ми е што наметнавме високи стандарди и придонесовме сите светски трендови и најреномирани брендови во оптичката индустрија да бидат достапни за нашите клиенти. Ја имаме и врвната оптометриска опрема за најсофистицирана дијагностика и одредување диоптрија.
Најбитните фази можеби си доаѓаа последователно, слушајќи ги нашите клиенти, следејќи ја нашата визија и професионалност. Со секој салон отворавме нова приказна. Некогаш невозможното го правевме можно.
Многу од овие еминентни брендови и крупни проекти биле неуспешни за многу поголеми метрополи, но ете, некогаш големата љубов и желба кон професијата си го прави своето и мило ми е што успеавме во остварувањето на сите наши проекти, иако скоро секој беше во нестабилно време и тешки околности.
МАРИЛИ: Колку продажни салони имате, колку оптиметриски кабинети и каков вид услуги нудите?
КОСТУРАНОВА: „Диоптра“ денес брои 7 салони и во повеќето од нив имаме оптометриски кабинети за проверка на видот, најсовремена опрема за изработка на оптички леќи од типот на 15-минутен сервис, стручен и професионален кадар што ги посетува сите тренинзи и обуки од најголемите светски производители на оптички производи. Технологијата толку брзо се развива, што навистина се трудиме секогаш да бидеме први. Ги посетуваме и сите светски саеми, конференции, презентации на нови колекции и се што е новитет во оптичката индустрија.
МАРИЛИ: Работите персонализирани стакла и персонализирани очила и тоа со најреномираниот бренд „Линдберг“, па во таа смисла објаснете ни што значи индивидуалниот пристап кон клиентите?
КОСТУРАНОВА: Индивидуалноста се повеќе се цени, посебно што сите ние имаме свој вкус, свој начин на гледање, диоптрија, физиономија...Очилата се дел од нас. Тие го отсликуваат нашиот карактер и може да ни прикријат или истакнат некој дел од лицето. Може да ни дадат одреден стил, да не ,,разубават”, да делуваме попаметни, посериозни...
Данскиот бренд „Линдберг“ е единствен по тоа што изработува персонализирани очила од врвни материјали како титаниум и кои иако повеќето се минималистички, може да се изработат со должина на рачки, мост, носници, според Вашата физиономија, да си одберете стил, боја од палета бои и имаат преку 450 000 комбинации. Притоа се со неколку патенти и овозможуваат најголем комфорт. Не случајно сите претседатели на држави, кралеви и светска елита ги носат. Никој ги немаше во регионот и посебно бевме горди што успеавме да ги донесеме во Скопје во нашиот салон „Диоптра Котур“. Пред неколку години кај нас се одржа и презентација на истиот бренд, дел од светската презентација во најголемите светски метрополи.
Индивидуализацијата и персонализацијата е присутна и кај оптичките леќи. Единствени сме во Македонија каде се мери видното однесување и диспаритетот на очите. Со најсовремена опрема може да измериме како Вашите очи функционираат едно со друго, како се однесувате при гледањето или дали ја поместувате главата или очите и на која далечина читате...се тоа за Вие да добиете најдобри персонализирани стакла со најголемо видно поле. Сите ние сме во постојана динамика и нормално е дека нашите желби за поголемо видно поле и подобар вид се неопходни. Со удобни персонализирани очила и индивидуални персонализирани очила за далеку и близина, многу наши клиенти изјавија дека ,,никогаш не гледале поубаво”,а тоа за нас е најголемиот успех.
МАРИЛИ: Подготвувате и посебна „Диоптра“ линија рамки и очила за сонце. За што станува збор и кога ќе бидат присутни на нашиот пазар?
КОСТУРАНОВА: Во 2018 „Диоптра“ го одбележа својот 25-годишен јубилеј, кој според многумина беше еден од најубавите настани организирани на овие простори. Како дел од јубилејот лансиравме оптичка колекција „Диоптра“ со наш дизајн, изработена во Италија од врвен производител. Мило ни беше што за неполн месец беше се распродадено. Се покажа дека нашето искуство да препознаеме што бараат нашите клиенти вроди со одлични резултати. Повеќе ги купуваа очилата од нашиот бренд за разлика од многу познати светски модни брендови.
Годинава, по тој повод ја зголемивме колекцијата и на сончеви, но повеќето се оптички, со препознатлив наш дизајн со врвен италијански квалитет и материјали. Се надевам ќе го постигнеме успехот на претходната јубилејна колекција „Диоптра“.
МАРИЛИ: Вие сте дипломиран оптиметрист. Каде се едуциравте и дали постојано се надградувате во областа?
КОСТУРАНОВА: Да, јас сум дипломиран оптометрист и магистер по дефектологија од областа на оштетен вид. Од секогаш сум била првенец во своето школување и сум се надградувала, зашто, само со знаење и љубов кон професијата може да напредувате. Паралелно со менаџерската дејност, оптометријата како моја базична дејност, неколку години бев активна и во академската кариера, како дел од кадарот на Универзитетот ,,Гоце Делчев” и мило ми е што придонесов во едукација на неколку генерации успешни оптометристи. Учесник сум и дел од научниот совет на неколку меѓународни конференции од областа на оптометријата, контактологијата и очната оптика.
МАРИЛИ: Со каков тим располага „Диоптра“ и колку е тој важен за успешно функционирање?
КОСТУРАНОВА: Како што веќе споменав, тимот е најбитен за успешно функционирање на било кој бренд и токму затоа се залагам тие да бидат, пред се, задоволни, мотивирани и едуцирани. Од 30 вработени, колку што сме сега, повеќето се оптичари, оптометристи и вистински професионалци со долгогодишно искуство. Мило ми е што го имам најдобриот тим што постои, секогаш фокусиран за уште поголеми успеси. Со самото тоа што тимот се зголемува и повеќето работат над 10, 15, па и 20 години, јасно е дека се лојални и функционираме како едно големо семејство. И, да ги цитирам моите вработени, кои пред некоја година ми посветија плакета за „Најдобра газдарица“ – „Твојот успех е наша мотивација...Тимот што победува не се менува“.
Обуките, тренинзите, тимбилдинзите, дружбите се наше секојдневие. Мое мислење е дека се е до енергијата и само задоволен човек на работното место може да го пружи својот максимум и да напредува и лично и во тимот.
МАРИЛИ: Што значи да се биде авангарда во она што го работите и кои се новините што први ги донесовте во нашата земја, како се останува постојано во врвот?
КОСТУРАНОВА: Мило ми е што секогаш ги следам своите визии и соништа. Многупати со страв, но секогаш со верба и надеж дека мора да успее. Можеби и тоа е тајната на нашиот успех, што за многу работи сме биле први. Уште на почетоците...Првиот автомат за брусење стакла, првиот авторфрактометар за одредување диоптрија, првите леќи во боја, првите леќи за кератоконус, првите прогресивни стакла, првите стакла во боја со диоптрија, први во многу познати брендови на очила, први персонализирани стакла, прва индивидуална колекција, први ланчиња за очила....Едноставно така функционираме и добро е што нѐ копираат и со тоа ни покажуваат дека навистина ни е добра идејата, а со самото тоа расте квалитетот и нивото на оптиките.
Неодамна еден колега од Србија ми кажа дека во Македонија се најубавите оптики благодарение на мене. Нашите оптики се навистина преубаво уредени и секоја е на свој начин убаво катче со специфичен дизајн, а не она што беше со години - бели рафтови со шипки за очила и некоја стаклена витрина. Сакајќи да не копираат и другите оптики почнаа да посветуваат внимание на изгледот и на тој начин придонесовме сите да бидеме подобри, што навистина ми претставува огромно задоволство.
МАРИЛИ: Вие сте успешна жена менаџер, но и жена лидер, па дали сметате дека лидерството е вродено или се учи и колку може да се доизградува?
КОСТУРАНОВА: Според мене, лидер се раѓаш. Тоа го носиш во себе. Дефинитивно треба да го негуваш, да се едуцираш и надградуваш, но не може да се научи ако едноставно немаш лидерска ѕвезда. Од најмала возраст сум лидер и секогаш заземам став кој се почитувал и од соработници, од колеги, од претпоставени, од вработени.
Многу пати важам за ,,тешка личност”, зашто, иако од мал пазар, секогаш сум ги „избоксувала“ најдобрите услови. И не случајно токму поради таа своја упорност и залагање сум била прогласена за најдобар дистрибутер во светот за шпанскиот бренд „Етниа Барселона“, кој е еден од најбрзорастечките брендови во светот. Честопати знаат да ме дадат за пример на другите дистрибутери во регионот и да посочат дека сме лидери во работата.
МАРИЛИ: Што е пресудно за да напредува жената во кариерата?
КОСТУРАНОВА: Се е битно. Цело е кога е се. Мозаикот се склопува кога сте образовани, зашто без знаење нема прогрес. Доколку немате лични карактеристики како упорност, амбиција, самодисциплина, не сте воркохолик, не сте мутитаскинг, немате визија, немате ноухау - нема успех. Семејството игра клучна игра за секаков развој на личноста. Јас сум патријархално и еснафски воспитана и без поддршката од моите родители, без поддршката од моите деца не би можела да ја имам таа сила што „поместува планини“.
Поддршката и мотивацијата од тимот е нешто најбитно. Јас имам одличен тим, на чело со мојата десна рака, која да не ми ја дава поддршката сигурно не би била толку успешна. Таа е спојницата помеѓу мене и тимот и знае одлично да ги избалансира работите од двете страни. Најбитно од се е да се најде баланс помегу сите овие битни работи и кога едното ќе намали, другото да компензира и да се одржи балансот, бидејќи среќа е, но и невозможно е секогаш сите точки да бидат во најдобар ред.
МАРИЛИ: Вие сте и мајка на две ќерки близначки. Како го постигнувате балансот помеѓу бизнисот и домашните обврски? Имате ли слободно време и како го исполнувате?
КОСТУРАНОВА: Најубавото, но и најтешкото за една жена менаџер е мајчинството. Од една страна ви дава невидена сила, од друга страна колку и да сте силни, ве прави најкршливото битие на овој свет. Многупати сум била во ситуација да имам битен состанок, патување или гостување на медиум кога децата биле болни и сум се чудела како сум издржала после непроспиена ноќ или немање сила и волја, да задржам концентрација и да бидам максимално професионална.
Мило ми е што веќе имам помош и поддршка од нив, што е најубавата награда за секоја мајка. И го добив од нив најголемото признание кога на проектна задача во училиште на тема претприемништво, одбрале да направат проект за мене. Тоа ми е најголемото признание до сега.
Слободното време, кое за жал го имам малку, се трудам да бидам со своите најмили, го користам на убави патувања, со пријатели кои се се помалку, но се поцврсти, на фитнес или пливање, да прочитам убава книга, одам во кино со децата, убава вечера или настан. Едноставно на нешто што ќе ми ги наполни батериите за нови предизвици и успеси.
Статијата е прочитана 2070 пати.
Видео: Избор на најуспешни жени мејаџери 2022
