Марина Анчевска – креатор на единствената сертифицирана Системска коучинг програма во регионот

Интервју со Марина Анчевска, акредитиран системски мастер коуч и НЛП мастер тренер, сопственичка и Извршна директорка на Центарот за бизнис психолгија, Системски НЛП, ЈИЕ – Скопје.

Центарот за бизнис психологија се издвојува по системскиот пристап, вели Анчевска, која додава дека и во самите НЛП програми и во сертифицираната коучинг едукација се вклучени уникатни системски вежби и техники кои имаат цел да поттикнат трансфорамација не само на когнитивното поле, туку и на соматско, енергетско, емоционално и системско поле.

Анчевска успешно ја организираше првата меѓународна коучинг конференција во земјава и регионот којашто како што вели таа, е резултат на нејзиното долгогодишно работење во областа на професионалниот коучинг, менторство и тренинг.

МАРИЛИ: Најпрво честитки за одличната организација на Првата меѓународна коучинг конференција која ја инициравте и спроведовте токму Вие? Оттаму прашањето, од каде потекнуваат инспирацијата и идејата за одржување на еден ваков грандиозен настан во сферата на коучингот?

АНЧЕВСКА: Ви благодарам на честитките и секако на вашата поддршка низ сите овие години на раст и развој на Центарот за бизнис психологија и на мене како професионалец.

Идејата за одржување на Првата меѓународна коучинг конференција се наметна како резултат на моето долгогодишно работење во областа на професионалниот коучинг, менторство и тренерство.

Низ годините работев многу на промовирање на коучингот како професија и од таму дојде инспирацијата за организација на конференцијата која пред сѐ имаше за цел да ја истакне потребата на коучингот како професија и воедно истата да го добие своето заслужено признание.

Коучингот како професија припаѓа во неформалното образование и неговото значење сѐ уште не е признаено и валидирано на начин на кој го заслужува.

Целта на коучинг конференцијата беше да го доближиме коучингот и бенефитите од истиот до сите индивидуалци, лидери, тимови, компании и до оние кои се стремат кон личен и професионален развој. Токму и тие беа учесници на истата.

Секако дека истата немаше да ја постигне својата цел без поддршка на моите партнери Ад Вербум евенти, како и нашите поддржувачи и спонзори.

МАРИЛИ: На Првата меѓународна коучинг конференција говереа експерти од многу области. Кои беа главните теми и што се работеше?

АНЧЕВСКА: Темите беа поврзани со практичната примена на коучингот и како истиот може да помогне во процесот на индивидуален и професионален раст и развој.

Говорниците, врвни експерти со долгогодишно искуство во коучингот, на свој уникатен начин, кај секој од учесниците, пред се, поттикнаа размислување и преиспитување на своите лични обрасци на дејствување, несвесните улоги на справување, ја проширија рамката низ која се доживуваме себе си и несебично споделија практични алатки кои можат да се применат во секојдневието со цел да ја поттикнат посакуваната промена.

Инспиративните разговори со панелистите кои се реномирани професионалци во својата област, го потврдија значењето на примената на коучинг алатките во професионалното опкружување.

Панелистите на учесниците им понудија увиди и практични совети за тоа како со помош на коучингот ќе можат поефикасно да водат луѓе и процеси. Инспиративни беа и поздравните обраќања на Трајан Ангелоски, претседател на Сојузот на стопански комори и Љупчо Ефтимов, продекан за настава и професор на Економскиот факултет во Скопје.

Нивните говори го потврдија значењето на лидерството и коучингот, како и значењето на неформалното образование.

На конференцијата имавме чест да го вклучиме онлајн во живо Џон Витингтон, авторот на книгата „Системски коучинг и констелации”. Разговорот со него им овозможи на учесниците да го разберат значењето на системскиот пристап во коучингот.

Благодарение на Ад Вербум кои ја преведоа неговата книга, сега истата за прв пат е достапна и за нашите читатели.

Практичните работилници кои се одвиваа во вториот дел и беа достапни за помала група, оставија голем впечаток кај сите учесници. Истите имаа можност да поминат низ интересни коучинг процеси и да добијат увиди во однос на нивните прашања и предизвици на лично и професионално ниво.

МАРИЛИ: Кои се заклучоците и придобивките од Првата меѓународна коучинг конференција?

АНЧЕВСКА: Според споделените искуства од учесниците на конференцијата можеме да заклучиме дека целта е постигната. Покрај примената во процес на личен раст и развој учесниците ја увидоа потребата на примената на коучингот во компаниите.

Во свет каде лидерството е повеќе од управување, професионалниот коучинг игра клучна улога. Лидерот на 21 век применува холистички и системски пристап, поставувајќи прашања кои водат кон решенија, наместо изговори.
За да може лидерот да води луѓе, процеси и луѓе во процеси, пожелно е да има соодветно познавање на коучинг техники.

Истите овозможуваат отклучување на потенцијалот на секој поединец, со цел да се зголемат  одговорноста, продуктивноста и перформансите и воедно поединецот да се насочи кон континуиран раст и развој.

Развивање на холистички начин на размислување во организацијата создава организациска структура која вибрира на високо ниво на свесност.

МАРИЛИ: Каква беше интеракцијата со публиката и дали дадовте одговори на сите прашања кои беа поставени? Кои се бенефитите за обичниот слушател?

АНЧЕВСКА: Коучингот е интерактивен релациски процес и концептот на конференцијата беше креаиран според тој принцип.

Имаше споделување на интересни лични приказни и искуства од страна на некои од учесниците на конференцијата кои под водство на професионалните коучи поттикнаа свесни процеси, не само кај оние кои споделуваа, туку и кај останатите учесници.

МАРИЛИ: Колку долго работите во сферата на коучингот и кои се спецификите по кои се издвојувате од другите центри од ваков вид?

АНЧЕВСКА: Мојата професионална коучинг кариера започна пред повеќе од 20 години кога во Холандија станав меѓународно сертифициран коуч. Тоа беше само почеток на едно интересно професионално патување кое се уште трае и се одвива паралелно со личен развој и себеусовршување како индивидуа.

Сите тие индивидуални и професионални процеси поттикнуваат трансформација, влијаат на развојот на мене како личност, на мојата професионална кариера и на мојот идентитет како мастер коуч и тренер.

Низ годините изградив свој уникатен пристап кој претставува синергија од се она што го имам искусено низ животните процеси на трансформација. Мојот пристап е системски. Ние постоиме поради релациите. Релацијата сам себе, со другите, со процесот во кој се наоѓаме, како и релацијата со околината и опкружувањето.

Сите ние сме водени од несвесни улоги кои сме ги формирале низ текот на животот и ни служеле во ситуации кои за нас биле предизвик. Истите ни помогнале да се заштитиме и да се чувствуваме безбедно.

Но, дали во секоја ситуација треба да мериме дали сме безбедни и сигурни? Секако дека не, но тоа е нашиот механизам за преживување.

Центарот за бизнис психологија уште од самите почетоци се издвојуваше по системскиот пристап. И во самите НЛП програми и во сертифицираната коучинг едукација се вклучени уникатни системски вежби и техники кои имаат за цел да поттикнат трансфорамација, не само на когнитивното поле, туку и на соматско, енергетско, емоционално и системско поле.

Индивидуата е дел од еден поголем систем од секаков вид: партнерство, семејство, тим, организација, општество. Затоа овој системски пристап ги идентификува процесите на комуникација и однесување во системот, базирани на вредностите и убедувањата на групата т.е. на системот. Доколку не ја знаеме минатата структура и не ја погледнеме индивидуата од една поширока системска димензија, тогаш никогаш нема да разбереме што е тоа што пробуваме да го смениме. 

МАРИЛИ: Колку напредува коучингот во меѓународни размери, не само во Европа, туку и на светско ниво? Дали успевате да го следите развојот и сите новини да ги имплементирате во вашето работење?

АНЧЕВСКА: Постојат голем број на коучинг правци како на пример: Life coaching, executive coaching, wellness coaching, parenting coaching и уште многу други.

Коучингот е дел од секојдневието и својата примена ја наоѓа во секој контекст, независно дали се работи за семејство, партнерство, тимска работа или лидерство. Јас, како системски коуч, секогаш тргнувам од целината и затоа системскиот коучинг има практична примена.

Секој систем е воден од скриени мотивирачки сили кои се невидливи, меѓутоа ефектите од нив ги гледаме преку реакциите и однесувањата на оние кои припаѓаат во системот.

Системскиот коучинг се фокусира на тоа што е индивидуата во системот, односно на позицијата што ја зазема во системот, што таа прави несвесно за системот и во какви заплети е несвесно навлезена.

Работејќи само на личноста може да се отстрани симптомот, но динамиката т.е. образецот кој припаѓа на ниво на систем, едноставно повторно ќе се појави и ќе биде изразена во друг контекст. Независно дали се работи за индивидуален, семеен, тимски или организациски коучинг, основно правило од кое тргнувам е дека прашањето не е никогаш прашањето.

Во позадина на однесувањето, дејствувањето, мотивацијата, одлучувањето, како и сите други секојдневни лични и професионални процеси, се испреплетени сите динамики на семејните системи од каде доаѓаме.

МАРИЛИ: Вие сте авангарда во областа на коучингот и не само што едуцирате други луѓе, туку и го живеете и практикувате лично. Што значи тоа за вашето секојдневие? Запознајте нѐ со некои од Вашите дневни ритуали?

АНЧЕВСКА: Коучингот е дел од мене и од моето секојдневие. Јас отсекогаш сум била љубопитна и сѐ уште сум за тоа како луѓето реагираат, која е нивната позитивна намера, каков живот имале моите претци, што живеам јас сѐ уште, а не ми користи, зошто некои луѓе успеваат да направат промена, а некои остануваат заглавени, како уште поедноставно да се водам себе си низ животните предизвици итн.  

Патот до професионален коуч, пред сѐ, е личен процес. Секој може да научи коучинг техники и вежби. Но, само когнитивното коучинг знаење не е доволно.

Освестување на личните несвесни процеси кои влијаат на однесувањето и предизвикуваат одредени резултати е првиот чекор кон патот до професионален коуч. Низ годините имам поминато многу меѓународни програми, тренинзи, едукации, ретрити и работилници од различни области за личен и професионален развој. Ретко која програма опфаќа целокупен холистички пристап.

Водена од моето долгогодишно искуство како меѓународно сертифициран и акредитиран НЛП Мастер тренер, Системски Коуч, Јога учител и Холистички терапевт, почувствував потреба да создадам сеопфатна Професионална Системска коучинг програма. Воедно, истата помина низ долг процес на валидација и пред 2 години доби меѓународно признаен и акредитиран сертификат, како единствена Системска коучинг програма во регионот!
 
Мојата мисија како професионален системски коуч е да поттикнам трансформација, а не само промена кај поединецот или организацијата.  Затоа верувам дека секој професионален коуч мора да има високо ниво на развиена емоционална, соматска, когнитивна, енергетска, системска и духовна интелигенција. 

Професионалниот системски коуч како лидер на процесот, покрај се друго исто така мора да има информираност, знаење и искуство во однос на влијанието на трауматичните искуства врз однесувањето, способностите и убедувањата на поединецот.

Не е доволно да знаете коучинг техники и да правите коучинг, најважно е да бидете и да се чувствувате коуч на ниво на идентитет.

Затоа најпрво се наметнуваат прашањата: Дали се следите себе си? Дали сте сам свој коуч? Дали се познавате себе си или знаете за себе?

Водена од мотото дека, „Животот е процес, а развојот е избор!” мојот ден започнува и завршува со благодарност за животот, за сите искуства кои ме освестуваат, предизвикуваат и водат кон трансформација.

Јас верувам во луѓето, верувам во себе и знам дека ништо не е случајно. Го почитувам своето тело, го следам и му го давам тоа што му е потребно за да биде витално и здраво. Свесна сум за потребите на мојата душа, ја чувствувам поврзаноста со сите оние кои се дел од мојата семејна временска линија и го следам патот на мојата душа.

Свесна сум дека она што го работам не го правам само затоа што го сакам и е добро за мене, туку затоа што има смисла на колективно ниво.

 

 

 

---

Статијата е прочитана 111 пати.

Сподели:

---