„ЕЛИТ Травел“ – Синоним за одлична организација и логистика за далечни патувања
![](/data/image/NASLOVNA_339.jpg)
Интервју со Слаѓана Стаменкова, генерален менаџер на туристичката агенција „ЕЛИТ Травел ДООЕЛ“ од Скопје, која постои и успешно работи повеќе од 13 години. Стаменкова е професионалец со 30-годишно работно искуство, а вработените во туристичката агенција се врвни професионалци кои секогаш им се на располагање на клиентите. Сите членови на тимот имаат IATA сертификати како и сертификати за глобалните системи за резервација на Amadeus и Galileo. Сите вработени се и сертифицирани туристички придружници.
Стаменкова беше прогласена за една од најдобрите жени менаџери за 2017 година од агенција „Марили“.
МАРИЛИ: „Елит Травел“ е една од најреномираните туристички агенции, особено во организирање на далечни патувања на егзотични дестинации? Има ли нови дестинации во вашите понуди за оваа година?
СТАМЕНКОВА: Епитетот, најреномирана туристичка агенција, веројатно го создадоа нашите клиенти кои со својата желба и лојалност, а наша помош, ја доживејаа убавината што ја нуди секоја една земја на светот како и различностите на културата, храната, историјата и сл.
Со тоа, нашите апетити за нови патување постојано растат и во тек се нови програми кои ги организираме за оваа година. Дел од нив, се посета на Кенија, Занзибар, Виетнам и Камбоџа, и се разбира секоја индивидуална желба на патниците.
МАРИЛИ: Препознатливи сте по организираните крстарења. Кои беа најатрактивни годинава и што се нуди за периодот што следи?
СТАМЕНКОВА: Точно така. Крстарењата се прекрасни. Крузерот е особено интересен начин на патување и доживување, особено за оние кои се љубители на погледот во хоризонтот.
Скоро секоја бродска компанија има прекрасни, дури и раскошни крузери со голем број на активности и настани кои се нудат во текот на крстарењето.
Но, најважно од сѐ е тоа што со крстарењето се нуди можност да се посетат повеќе дестинации во еден релативно краток временски период на патување.
Како поатрактивни би ги издвоила крстарењата во Соединетите Американски Држави, каде што патниците имаат можност да посетат и видат повеќе земји и да ги доживеат прекрасните убавини на Мајами, Њујорк и сл.
Исто така, не ги исклучуваме и европските крстарења, како на пример крстарењето по Фјордовите, кое е незаборавно искуство.
МАРИЛИ: Дали се зголемува интересот кај македонските граѓани за посета на далечни и егзотични дестинации и постои ли место, дестинација, која е омилена и најбарана во постковид периодот?
СТАМЕНКОВА: Може да се каже дека по ковид периодот, а секако и со делумно влијание на социјалните мрежи кои нудат прекрасни видео снимки и фотографии од најразлични дестинации во светот, интересот е секако зголемен.
Нашите граѓани се заинтересирани за секоја дестинација која нуди добра понуда, сакаат авантура и сакаат да посетат што повеќе места.
Во најбарани и најпосакувани дестинации на нашите клиенти можат да се вбројат Малдиви, Куба, Тајланд, но и многу други.
МАРИЛИ: Што се преземате како туристичка агенција во организирањето на едно далечно патување или крстарење, со оглед на тоа дека вашата работа е комплексна и бара беспрекорна организација?
СТАМЕНКОВА: Пред сѐ, колку и да е интересна оваа работа, бидејќи органзираме патувања во странство и се работи со луѓе, е особено одговорна.
За секоја програма треба да се посвети целосно внимание на секој сегмент од патувањето.
Дали тоа вклучува авионски билет, хотелско или апартманско сместување, трансфери, патничко и здравствено осигурување, водич и сл.
Самата органзицаија на едно далечно патување во позадина има голема логистика, план и безбедна реализација.
Се трудиме секогаш во секое патување, најпрво да ја обезбедиме довербата на клиентите со самото тоа што безбедно, сигурно и практично ќе ги донесеме на бараната дестианција за да бидат задоволни и да уживаат.
Впрочем, за тоа и постоиме ние туристичите агенции.
МАРИЛИ: Каква е соработката со компании во делот на продажба на авиокарти и конгресен туризам?
СТАМЕНКОВА: Како наша специјалност, продажбата на авионските карти е наша омилена работа.
Македонските компании и институции, како и странските инвестиции во нашата држава имаат потреба од туристичка агенција која ќе им го обезбеди делот со патувањата на нивните вработени. И тоа, обемот на побарувања, посебно од македонските компании, стана се почест, што особено ме радува.
Како овластена агенција од БСП системот за продажба на авиокарти, продаваме авиобилети буквално за секое место во светот. Конгресниот туризам исто така е еден вид на организациска работа, која исто така е дел од корпоративната работа со компаниите.
МАРИЛИ: Што ќе им препорачате на туристите ова лето, каде е најдобро да се патува или летува?
СТАМЕНКОВА: Најдобра локација не постои, бидејќи сите патници имаат различни желби и замисли за нивните летувања.
Секогаш, нашиот јужен сосед е добар избор, бидејќи е најблиску и има најубави плажи.
Можеби препораката е да се избегне пикот на летото поради високите температури и да се патува кон крајот на месец август и почетокот на септември.
Во тој период, и високите цени на сместувачките капацитети се намалуваат.
МАРИЛИ: Која е Ваша омилена дестинација? Што преферирате на патувањата, да шетате, да пливате, да одите на сафари или пак нешто сосема друго?
СТАМЕНКОВА: Јас немам конкретна дестинација која би ја издвоила, бидејќи до сега, секаде сум имала посебно искуство и сум доживеала своевидна убавина. Секогаш на секое мое патување, претпочитам да се опуштам и да уживам во убавините на добрата храна и убавото вино.
Сакам да пливам на убава плажа, но понекогаш на одредна дестинација и активно да шетам и посетам што повеќе знаменитости.
Тоа нѐ прави најбогати на свет и никој не може да ни го земе искуството од секое патување. Тоа мое искуство, кое приватно го доживувам, сакам да им го пренесам и на моите клиенти, a со тоа ги спојувам убавото и корисното.
Статијата е прочитана 976 пати.