„Марили Бизнис Клуб“ го одбележува осмиот роденден

На 7-ми декември МАРИЛИ БИЗНИС КЛУБ (МБК) одбележува осум години од основањето. Во изминатите осум години евидентна беше успешната континуирана соработка и вмрежување на жените менаџери – членки на клубот.

МАРИЛИ БИЗНИС КЛУБ (МБК) е формиран на 7 декември 2016 година и во него членуваат жени менаџери што биле дел од изборите за најуспешни жени менаџери кои ги спроведуваше агенција „Марили“ во изминатите 28 години, а има и почесни членки. Клубот има свои симболи, заштитно лого, значка и клуб-картичка за секоја членка.

МБК е формиран со цел да ги обедини најуспешните жени менаџери што биле дел од проектот на агенција „Марили“ – „Избор на најуспешни жени менаџери“ и да овозможи нивна подобра комуникација, соработка и размена на идеи и искуства. Идејата наиде на големо одобрување и желба позитивната енергија што ја носат овие жени во себе да ја споделуваат не само за бизнис проекти, туку и за проекти од општо општествено значење и да бидат гласот на жената во општеството за нејзините севкупни права, а особено за нејзините лидерски позиции во бизнис заедницата. За членките на МБК многу важен аспект е хуманоста. До сега клубот спровел четири хуманитарни донации како општествен придонес кон заедницата.

МБК брои над 170 членки, а од пред три години во него се вклучени и жените менаџери што биле дел од изминатите три манифестации кои имаа регионален карактер, па дел од МБК се и менаџерки од Хрватска, Србија, Црна Гора и Косово.

Целта беше да се овозможи заемна поддршка и соработка особено во услови на повеќеслојни кризи, водејќи се од мотото „Заедно сме посилни“, но излегувајќи од границите на нашата земја, што беше и една од целите на овој Клуб уште при неговото формирање.

Во рамки на средбите на МБК досега се одржани бројни едукации,  хуманитарни акции, разменувани се искуства и идеи, а во услови на пандемиска, економски и енергетска криза овозможена е зголемена соработка и заемно помагање за надминување на тешкиот период. Сето тоа со посредство на агенција „Марили“ која ги споделуваше информациите на сите членки.  

На последната средба одржана на 4.10.2024 година, во просториите на Стопанската комора на Северна Македонија беа  промовирани новите членки на Клубот, а се проговори за идните планови на Клубот, како и за проектите на маркетинг агенцијата „Марили“ за 2025 година. 

Мисијата на Клубот се продлабочуваше постојано и во текот на овие изминати седум години ги надмина првично поставените цели.

Денес МАРИЛИ БИЗНИС КЛУБ ги третира најзначајните бизнис теми поставувајќи ги на високо општествено ниво, преку проектот „Марили Бизнис Форум“ кој е регионален и има за цел да даде одговори на многу економски состојби.

Жените менаџери, лидери и претприемачи се значајно јадро на македонската економија, а нивните искуства, практики и сознанија даваат витални идеи за надминување на актуелните состојби.

Тие се креатори на општествената реалност и пример за младите генерации за тоа како се чекори по трнливиот пат на успехот.

Овие жени даваат поттик не само во борбата за женски права, родова рамноправност во општеството и во бизнис секторот, туку и за извојување на битките со кои се соочуваат младите генерации.

Агенција „Марили“ преку МАРИЛИ БИЗНИС КЛУБ ќе продолжи да биде мост за заемно помагање и комуницирање меѓу своите членки, борејќи за подигање на колективната свест за улогата на жената во општеството, особено како менаџер, претприемач и лидер.

Статијата е прочитана 154 пати.

Сподели: