Светскиот бестселер „Птиците умираат пеејќи“ објавен на македонски јазик

Светскиот бестселер „Птиците умираат пеејќи“ од познатата австралиска писателка Колин Мекалоу е објавен на македонски јазик во издание на „Бата прес“. Според овој љубовен историски роман за кој критичарите оценуваат дека е рамо до рамо со „Војна и мир“ од Толстој и „Одвеано од виорот“ од Маргарет Мичел, снимена е познатата истоимена хит телевизиска серија, која што беше една од најгледаните во осумдесеттите години на минатиот век и подоцна.

Меги е ќерка на сиромашни доселеници од Австралија. Уште од мала таа е запоставена од нејзините родители и постојано живее по религиозните и патријархални правила на нејзината фамилија и стегите што ги наметнува гратчето и огромниот имот „Дрогхед“.

Ралф е млад, убав и речиси совршен свештеник, што назначувањето во Австралија во почетокот го доживува како казна. Неговите силни свештенички амбиции се насочени на друга страна, кон мистичниот Ватикан. Уште од првиот момент кога ќе ја запознае десетгодишната Меги таа му станува многу мила и постојано е нејзин заштитник. По неколку години, една вечер, кога погледите ќе им се сретнат, сега веќе преубавата тинејџерка Меги ќе пробуди чувства кај Ралф, чувства какви што тој никогаш немал, а и не ни знаел дека ги има. Од тој момент, Ралф е во вечно искушение дали тој е совршен свештеник и има неограничена љубов кон Бога, или, сепак, постои жена, на чиј мирис, убавина и нежност не може да им одолее.

Дејствието и љубовната сага во романот, што се одвива во Австралија, Нов Зеланд, Ватикан, Лондон, Берлин... опфаќа повеќе од половина век – двете светски војни, а говори и за односот на официјален Ватикан кон фашизмот и Хитлер. Тука се преплетуваат судбините на неколку генерации. Оваа љубовна и семејна сага сведочи и за сушите, пожарите и поплавите кои се заканувале со целосно уништување на имотите во Нов Зеланд.

Колин Мекалоу (Colleen McCullough) е родена 1937 година во Австралија. По образование била неврофизиолог и работела како истражувач и предавач на Медицинскиот факултет на Универзитетот Јејл. Писателската кариера ја започнала со романот „Тим“, а после тоа го напишала светскиот бестселер „Птиците умираат пеејќи“ што досега во светот е продаден во повеќе од 30 милиони примероци.

Библиографијата на Мекалоу е долга, а добитничка е на бројни награди и признанија. Колин Мекалоу е авторка и на исклучително популарната серија историски романи за Стариот Рим, како и на пет криминалистичко-детективски романи. Освен проза, таа пишувала текстови и за музички театар. Почина во 2015 година.

Статијата е прочитана 646 пати.

Сподели: