Интервју со Санија Мурати, претседателка на „НВО Лејди“ Косово - 20 години поддршка и сила на илјадници жени, да се остварат во бизнис сферата
Интервју со Санија Мурати, претседателка на невладината организација НВО „Лејди“ од Косово, која годинава го прославува својот 20-годишен јубилеј.
НВО „Лејди“ и Куќата за советување (Советувалиште) веќе две децении нудат сеопфатна, специфична помош, прилагодена на секоја жена, професионално советување и менторство, обуки за започнување и подобрување на бизнисот, психо-социјална поддршка и правна помош, програми за образование и вработување, вмрежување на локално, регионално и меѓународно ниво.
„Сакаме секоја жена да чувствува дека не е сама и дека може да го оствари својот целосен потенцијал.“, вели Санија Мурати за „Марили“.
Мурати е лауретка, прогласена за една од најуспешните жени менаџери од земјава и регионот на манифестацијата „Избор на најуспешни жени менаџери“ која се одржа 2023 година.
МАРИЛИ: Како започна приказната за „НВО Лејди“ и Куќата за советување (Советувалиште) и која беше вашата мисија?
МУРАТИ: Приказната за НВО Лејди започна пред 20 години со силна желба секоја жена да го пронајде својот безбеден простор, поддршка и пат кон независност. Куќата за советување (Советувалиште), беше создадена да биде рака што води, разбира и помага - место каде што жената може да верува и да расте.
Нашата мисија од првиот ден останува иста, да ја препознаеме силата на секоја жена, да ги негуваме нејзините таленти и да ѝ помогнеме да блесне во општество кое често го заборава нејзиниот глас.
МАРИЛИ: Кои се најзначајните проекти во изминатите две децении и какви се резултатите?
МУРАТИ: Не зборуваме за статистика - зборуваме за животите што ги променивме. Илјадници жени ги започнаа своите бизниси, најдоа работа, ја вратија самодовербата и достоинството.
Работевме на проекти што градат економска независност, обезбедуваат образование, поддршка и мрежи на соработка. Резултатот е повеќе од бројки – тоа се приказните на жени кои не се откажуваат, кои инспирираат и кои продолжуваат да растат и да ги трансформираат своите заедници.
МАРИЛИ: Каква помош и поддршка им обезбедува НВО „Лејди“ на жените?
МУРАТИ: Нашата поддршка е сеопфатна, специфична и прилагодена на секоја жена: професионално советување и менторство, обуки за започнување и подобрување на бизнисот, психо-социјална поддршка и правна помош, програми за образование и вработување, вмрежување на локално, регионално и меѓународно ниво. Сакаме секоја жена да чувствува дека не е сама и дека може да го оствари својот целосен потенцијал.
МАРИЛИ: Во кои области жените најчесто постигнуваат успех и дали започнуваат свои бизниси?
МУРАТИ: Жените се истакнуваат во занаетчиството, креативните индустрии, туризмот, агробизнисот и образованието.
Многу од нив започнале со микро и мали бизниси кои подоцна прераснуваат во стабилни и препознатливи брендови.
Ние го следиме нивниот раст и во Косово и во дијаспората, а нивните приказни нè потсетуваат дека корените на успехот започнуваат во довербата, поддршката и упорноста.
МАРИЛИ: Women’s book - која беше целта на овој меѓународен проект?
МУРАТИ: Книга за жени е приказна за жени кои не познаваат граници. Проектот е создаден пред пандемијата, а завршен по неа, и ги прикажува соништата, борбите и победите на жените од шест земји од Западен Балкан. Целта беше да се оснажат, охрабрат и поврзат жените преку нивните инспиративни приказни, покажувајќи дека силата и солидарноста на женската заедница можат да ја надминат секоја криза.
МАРИЛИ: Организиравте регионални конференции. Колку сте задоволни од резултатите и целта на овие собири?
МУРАТИ: Организиравме серија конференции кои собраа силни, инспиративни жени од целиот Западен Балкан, вклучувајќи ја и Северна Македонија.
Повратните информации беа извонредни - учесничките си заминаа овластени, поврзани и мотивирани за нови иницијативи.
Целта на конференциите беше да се создаде простор каде што искуствата, идеите и визијата можат да растат заедно, бидејќи веруваме дека жените кои соработуваат и се поддржуваат едни со други можат да постигнат извонредни резултати.
МАРИЛИ: Колку е важна соработката со институциите на Косово? На кои проекти работите моментално со нивна поддршка?
МУРАТИ: Соработката со државните институции им дава на нашите проекти стабилност, видливост и долгорочна одржливост. Моментално работиме на програми за вработување, образование и економско јакнење на млади жени, сите во партнерство со институциите. Оваа поддршка им овозможува на нашите програми да стигнат до што е можно повеќе жени и нивната сила да биде препознаена и поддржана на сите нивоа.
МАРИЛИ: Колку е важна довербата на жените за работата на вашата организација?
МУРАТИ: Довербата е срцето на нашата работа. Без доверба немаше да траме ниту една година, а камоли две децении.
Она што нè одржува се доследноста, чесноста, професионализмот и автентичноста.
Секоја жена што доаѓа кај нас чувствува дека е почитувана, слушната и дека нејзиното искуство навистина значи нешто.
МАРИЛИ: Колку предизвикувачка, но и благородна е оваа работа? Што ве мотивира?
МУРАТИ: Работата е емоционално предизвикувачка, но е и најблагородниот пат што можев да го изберам. Ме мотивира трансформацијата што ја гледам кај жените - нивниот раст, самодоверба, успех и благодарност.
Секоја приказна за успех потврдува дека сме на вистинскиот пат и ми дава енергија да продолжам со страст и посветеност.
МАРИЛИ; Каква е поддршката од вашето семејство и колку е важна за професионалниот успех на жената?
МУРАТИ: Поддршката од семејството е основа на силата. Моето семејство е мојата поддршка, инспирација и причината зошто можам да работам со сето срце. Кога жената има разбирање и поддршка од најблиските, нејзиниот професионален пат станува постабилен и посмел, но верувам дека и поединецот може да постигне успех, иако патот тогаш е многу потежок.
МАРИЛИ: Кои се плановите на НВО „Лејди“ за 2026 година? Дали се планирани нови регионални конференции?
МУРАТИ: За 2026 година планираме проширување на програмата за млади жени, ново образование и зајакнување на меѓународната соработка.
Првите најави за регионалната конференција се веќе тука, а таа повторно ќе ги собере жените од целиот Западен Балкан и пошироко.
Продолжуваме да растеме, да иновираме и да отвораме врати за нови генерации, бидејќи секоја жена заслужува да блесне.
Статијата е прочитана 229 пати.
Видео: Избор на најуспешни жени мејаџери 2022
