Бизнис вести

Средба во Министерството за финансии со бизнис заедницата за хармонизација на царинските стапки

четврток, 08 јули 2021

Усогласувањето на царинските стапки со стапките на ЕУ ќе доведе до јакнење на конкурентноста на домашната индустрија, зголемени инвестиции од страна на компаниите, а со тоа и нови вработувања. Ова беше посочено на состанокoт во Министерството за финансии на кој присуствуваа министерот за финансии Фатмир Бесими, вицепремиерот Фатмир Битиќи, министерот за економија Крешник Бектеши, министерот за земјоделство, шумарство и водостопанство Арианит Хоџа и претставници на Стопанска комора на Северна Македонија, Сојузот на стопански комори на Македонија, на Стопанската комора на северо-западна Македонија, претставници на МАСИТ, МАТТО, како и на АмЧам Северна Македонија.

„Усогласувањето на царинските стапки е барање на стопанствениците во насока на хармонизација на царинските стапки на одредени тарифни броеви со стапките на Европската Унија. На состанокот беше претставена анализата која ги опфаќа сите доставени барања за измена на царинските стапки на тарифните броеви од страна на сите стопански комори и ефектот врз македонската економија. Принципите врз кои се заснова и е работена анализата се заштитата на домашното производство и хармонизација на царинските стапки со стапките на ЕУ која треба да придонесе јакнење на конкурентноста на домашната индустрија, создавање поатрактивни услови за странските инвеститори, како и поинтензивно вклучување во глобалните синџири на снабдување, односно создавање додадена вредност“, велат од Министерството за финансии.  

Додаваат дека дијалогот и партнерството на Владата на Република Северна Македонија со бизнис заедницата се одвива во континуитет. Преку средбите со бизнис заедницата се дискутираат сите прашања за кои институциите прават сериозни анализи и се преземаат соодветни активности.

„Од бизнис заедницата слушнавме предлози кои понатаму ќе бидат  разгледaни и она што е во насока на помош и поддршка ќе биде прифатено. Владата е тука да создава услови и деловен амбиент за работа, развој на инвестиции, на извозот, а со тоа и на севкупната економија“, посочуваат од ресрното Министерство.

Креирање поволно деловно опкружување преку системско редифинирање на царинскиот тарифник, намалување на други парафискални давачки и даночно олеснување и одложување на неколку јавни давачки беше предвидено и во Петтиот пакет антикризни мерки, а што беа и барања од стопанствениците. 

Мерките се дизјанирани за директна поддршка на стопанството и компаниите, а со тоа и поддршка на граѓаните со подобрување на животниот стандард и работните услови.

 

Содржината е прочитана 85 пати.