Бизнис вести

Промовирана бескаматна кредитната линија „Ковид 4“ со која на стопанството му се ставаат на располагање 10 милиони евра

среда, 07 јули 2021

Нова бескаматна кредитна линија „Ковид 4“ наменета за микро, мали и средни претпријатија беше промовирана денеска од страна на вицепремиерот за економски прашања, Фатмир Битиќи, министерот за финансии, Фатмир Бесими и извршниот директор на Развојната банка, Кире Наумов. Со оваа кредитна линија на стопанството му се ставаат на располагање 10 милиони евра, за кои компаниите ќе може да аплицираат од 15. јули.

„’Ковид 4’ бескаматната кредитната линија изнесува 615 милиони денари, или околу 10 милиони евра и со оваа линија ќе бидат поддржани микро, мали и средни трговски друштва од најпогодените сектори од Ковид-19 од таргетираните дејности во делот на кредитокорисниците, занаетчиите кои плаќаат давачки на реален приход, трговските поединци и приватните здравствени установи. Износот на кредитот ќе биде дефиниран во зависност од бројот на вработените и падот на приходите и може да изнесува од 3.000 до 30.000 евра. Роковите за отплата ќе се движат од 36 до 42 месеци со 12 месеци грејс период. Би сакал да укажам дека во оваа кредитна линија е овозможена и грант компонента до 50 проценти од висината на кредитот, доколку корисниците ги исполнат потребните условите, а тоа е во 2021 година да имат 5 отсто повеќе вработени во однос на 2020 и вкупните приходи во 2021 да се зголемени за 10 проценти во однос на лани, или може да добијат грантови од 20 или 30 проценти доколку е остварен еден од условите“, рече Битиќи.

Директорот на Развојната банка, Кире Наумов ги појасни деталите на јавниот повик потенцирајќи дека аплицирањето за оваа четврта бескаматна кредитна линија започнува на 15. јули од 09:00 часот.

„Со објавата на повикот за ’Ковид 4’ се стават на располагање уште 10 милиони евра за приватните субјекти кои во 2020 година имале најмалку 30 проценти пад на приходите. За кредит од ’Ковид 4’може да аплицираат субјекти кои не користеле средства од првата мерка од Петтиот економски сет, односно, мерката за финансиска поддршка за плати за февруари и март на УЈП, субјекти кои не користеле кредит од ’Ковид 3’од Развојна банка и субјекти кои користеле кредит од ’Ковид 1’ и/или ’Ковид 2’ но немаат неподмирени достасани обврски на денот на аплицирање“, појасни Наумов.

Тој додаде дека документите кои се потребни при аплицирањето се во голема мера идентични со претходните бескаматни кредитни линии, а задолжителните документи вклучуваат кредитно барање, ЗП образец и изјави кои може да се симнат од веб-страницата на Банката каде што е објавен и Јавниот повик.

Министерот за финансии, Фатмир Бесими, пак, истакна дека годинава ќе биде година на заздравување, а приоритетите кон кои е насочена Владата и Министерството е постигнување повисоки стапки на економски раст од 4 до 5 проценти годишно, како и раст на платите за 20 до 30 проценти на среден рок, со цел подобрување на стандардот на граѓаните.

 

 

 

Содржината е прочитана 87 пати.