Култура

Настап на Трпчески во Хановер, следно гостување во Финска

Македонскиот пијано виртуоз Симон Трпчески на 29 септември ќе настапи во Лахти, Финска, каде што со Симфонискиот оркестар на градот ќе го изведе Концертот број 3 за пијано и оркестар на Бела Барток, под диригентство на Далиа Стасевска од Осло.

четврток, 22 септември 2016

Македонскиот пијано виртуоз Симон Трпчески на 29 септември ќе настапи во Лахти, Финска, каде што со Симфонискиот оркестар на градот ќе го изведе Концертот број 3 за пијано и оркестар на Бела Барток, под диригентство на Далиа Стасевска од Осло. Претстојниот концерт следува по одличниот прием на Трпчески од германската публика во Хановер.

- Откако ја награди со два биса по виртуозната изведба на Концертот број 2 за пијано и оркестар од Рахманинов заедно со Градскиот оркестар на Хановер, под диригентската палка на хрватскиот диригент Иван Репушиќ, публиката во Операта во Хановер, „потајно организирана“ од славната американска оперска пејачка, сопранот Хелен Донат, му возврати на македонскиот пијанист Симон Трпчески со несекојдневна честитка – стоечки му ја отпеа традиционалната за вакви пригоди песна „Среќен роденден!“, соопшти КултурОп.

Концертот во Хановер се надоврза на настапите во Италија, Словенија, Шведска и Холандија. Во октомври Трпчески ќе се врати на престижната сцена на „Концертгебау“ во Амстердам - со Концертот број 3 за пијано и оркестар од Рахманинов, во чија изведба две вечери ќе го придружува Холандскиот филхармониски оркестар. Потоа Трпчески ќе продолжи да концертира во Соединетите Американски Држави.

(Преземено од МИА)

 

Содржината е прочитана 360 пати.