Култура

Снимена првата клапа од видео-омажот за Живко Чинго

Министерката за култура Елизабета Канческа-Милевска вчера присуствуваше на почетокот на снимањето на документарниот филм „Мајстор Чинго“, кој е своевиден видео-омаж на едно од водечките имиња во современата македонска литература, големиот раскажувач Живко Чинго.

среда, 01 јуни 2016

Министерката за култура Елизабета Канческа-Милевска вчера присуствуваше на почетокот на снимањето на документарниот филм „Мајстор Чинго“, кој е своевиден видео-омаж на едно од водечките имиња во современата македонска литература, големиот раскажувач Живко Чинго.

Режисер на филмот е македонскиот бард Љубиша Георгиевски, сценарист Сашо Миленковски, за дизајнот на продукцијата е задолжена Мери Георгиевска, а продуцент на филмот е Петар Ѓуровски. Директор на фотографија е Горан Наумовски, а стручен консултант е проф. д-р Виолета Ачковска, која е историчар и е во роднинска врска со Чинго.

- Овој проект беше одобрен во Програмата на Кинотека на Македонија за годинава, кога се одбележуваат и 80 години од раѓањето на големиот раскажувач и еден од најмаркантните ликови во македонското книжевно творештво Живко Чинго, рече Канческа- Милевска.

Чинго, како што рече, остави длабоки корени во македонската култура и го позиционираше македонското книжевно творештво во светски рамки.

Министерката за култура информира дека филмот ќе биде поразличен од документарните филмови кои се снимаат, еден виртуелен разговор на Живко Чинго со нашиот режисер Љубиша Георгиевски. Филмот ќе биде готов до крајот на годината.

Режисерот Георгиевски рече дека при снимањето на филмот ќе оди немилосрдно, слушајќи го своето срце.
- Јас со Чинго имав многу богата творечка соработка, ја драматизирав неговата „Пасквелија“ и ја режирав во три театри, во Сараево, Риека и Нови Сад, рече Георгиевски.

Продуцентот Ѓуровски појасни дека филмот почна да се снима во МНТ, каде Чинго бил директор и додаде оти тука е неговата биста. Филмот ќе се снима и во Велгошти, Скопје, на гробишта...

Бошко Грујоски, директор на Кинотека на Македонија потенцира дека филмот ќе се снима летово и изрази надеж дека дека при крајот на декември ќе биде прикажан пред публиката.

Професорката Ачковска рече дека Живко Чинго бил исклучителен македонски творец и длабоко емотивна личност, кој со себе носел голема хуманост. Според неа, импресионира неговото творештво кое има жестока критика кон еден систем на едноумие.

(Преземено од МИА)
 

Содржината е прочитана 380 пати.