Бизнис вести

Бесими – ММФ: „Целта ни е следните години растот да се удвои“

четврток, 10 септември 2020

Кризата предизвикана од Ковид-19 и нејзиното влијание врз македонската економија, преземените и новите пакет-мерки што се изготвуваат во соработка со сите чинители во економијата и во консултации со Светска банка и ММФ, беа тема на разговор на првата онлајн средба на министерот за финансии, Фатмир Бесими ао претставниците на Меѓународниот монетарен фонд, Бергјот Бјорнсон Баркбу, шеф на мисијата за Македонија и Штефани Ебле, регионален резидентен претставник за земјите од Западен Балкан.

„Главен приоритет ќе биде ублажувањето на ефектите од ковид-кризата и обезбедување солидна основа за заздравување на економијата, а притоа зачувување на макроекономската стабилност. Ќе се следи работата на инситуциите и реализацијата на планираните проекти за конкретната година и во согласност со тоа ќе се утврдува колку средства ќе им се доделуваат наредната година. Потоа, фокусот ќе биде ставен во привлекување финансиски средства во нашата економија од надворешни извори на финансирање, како и разгледување можности за мобилизирање на слободните финансиски средства од домашниот финансиски пазар, а со тоа, во координација со Народната банка, задржување на финансиската и монетарната стабилност во економијата“, истакна Бесими.

Министерот потенцира дека доколку успешно се спроведат политиките поддржани и со евроатланските интеграции коишто делуваат како катализатор на растот, очекува во следните години просечниот раст да се удвои, што би значело дека во најуспешните години може да се надмине психолошката граница за раст над 4 отсто.

Од ММФ истакнаа дека континуирано ја следат состојбата во македонската економија и дека ќе продолжат да не поддржуваат во рамките на своите можности, како што претходно помогнаа со Инструментот за брзо финансирање од 176,5 милиони евра.

 

Содржината е прочитана 37 пати.