Култура

„Бата прес“ го објави романот „Вон жариштето“ од Кјара Карминати

Првата промоција на делото ќе биде во официјалната програма на Промотивниот центар на Саемот на книгата во Скопје на 10 септември

среда, 09 септември 2020

Во издание на „Бата прес“ објавен е романот „Вон жариштето“ од италијанската авторка Кјара Карминати. Делото на македонски јазик го преведе Калина Јанева, а е објавено со поддршка на Министерството за култура и ЕУ во програмата „Креативна Европа“ со која е прифатен проектот на „Бата прес“ под наслов „Време е за книга“, со кој е предвидено објавување на дела за млади од 10 познати европски автори.

Првата промоција на делото ќе биде во официјалната програма на Промотивниот центар на Саемот на книгата во Скопје на 10 септември.

Дејствието на романот се одвива во Првата светска (Големата) војна од 1914 до 1918 година на северот на Италија, порано дел на Австро-Унгарија. Приказна за една фамилија раскажана од едно весело, младо девојче. „Кога започна војната, сите бевме среќни.“ Летото 1914 година, Јоланда или нагалено Јоле на 13 години веќе работеше на рингишпил. Не требаше долго за да ги разбере последиците од конфликтот каде ги испраќаат мажите и ги оставаат жените сами. А и самата страдаше од последиците. Разделена од мајка ѝ, трауматизирана од бомбардирањето, таа и нејзината сестра трагаат низ селата за да ја најдат нивната баба што никогаш не ја запознале. Среде војната ја доживува својата прва љубов. Преку нарацијата на Јоле – длабока и живописна раскажувачка – нивните искуства се истите оние како на сите жени што остануваат надвор од линијата на огнот, далеку од фронтот, замаглени, речиси невидливи, додека историјата продолжува безмилосно. Тринаесет раскажани слики формираат нарација базирана на дневници, сведоштва, извештаи и документи.

Кјара Карминати (Chiara Carminati) е родена е во 1971 година во Удине, Фурланија. Дипломирала современа книжевност на Универзитетот во Трст, а на постдипломски студии била во Франција. Добитничка е на бројни книжевни награди, меѓу кои и наградата „Андерсен“ за најдобра авторка за 2012 година. За романот „Вон жариштето“ (2014) ги има освоено наградата „Обрил“ (2015) на Здружението на независни детски библиотеки, наградата „Алваро-Биџарети“ (2015), наградата за литература за деца „Лаура Орвието“ (2013-2015), како и наградата „Стрега“ (2016) за деца. Меѓу нејзините најпознати дела може да се издвојат: „Морето во песна“ (2000),„Карневал на животните“ (2004),„Четири годишни времиња“ (2004), „Тековен дневник“ (2009), „Последната Бахова фуга“ (2012) „Убави ѕверки“ (2013), „Што е тоа пријател“ (2016) и многу други.
 

Содржината е прочитана 58 пати.