Култура

Недела на дизајн во Скопје од денес до 29 ноември

Петтата Недела на дизајн во Скопје (Skopje design week) ќе се одржува од денес до 29 ноември, годинава на нова локација – во Центарот за дизајн и иновации Јавна соба, кој беше отворен минатиот месец. 

четврток, 26 ноември 2015

Петтата Недела на дизајн во Скопје (Skopje design week) ќе се одржува од денес до 29 ноември, годинава на нова локација – во Центарот за дизајн и иновации Јавна соба, кој беше отворен минатиот месец.

Манифестацијата и оваа година ќе понуди предавања и работилници за дизајнери и архитекти, со над 150 учесници од Македонија и од неколку земји, работилници за деца и музичка програма. Во фокусот на годинашното издание ќе биде изложбата „Млади балкански дизајнери“.

По повод малиот јубилеј, ќе бидат претставени околу 30 македонски брендови кои во изминатите пет години биле поддржани од „Скопје дизајн вик“. Целта е да се охрабрат дизајнерите и компаниите за нови производи кои ќе се пласираат како бренд во земјава и во странство, а Јавна соба во својот нов простор им нуди и работилница каде што може да ги развијат прототиповите.

Директорот на „Скопје дизајн вик“ Александар Велиновски на прес-конференција рече дека со новоотворениот простор манифестацијата не трае само неколку дена, туку 365 дена зашто Јавна соба е отворена за секој креативец. Со целосното опремување на мајсторската работилница за прототипови во 2016, тој очекува во наредните години да се остварат над 150 нови македонски брендови – производи и услуги кои, како што рече, нема да бидат виртуелни, туку ќе ги има реално на пазарот.

Посочи дека е важна поддршката на македонски брендови дома зашто од тоа зависи и нивната афирмација надвор од Македонија.

- Мора прво да ја зајакнеме домашната сцена и кон домашните брендови да се однесуваме со повеќе почит, бидејќи повеќе ги вреднуваме странските брендови, а домашните ги запоставуваме. Покрај продукција, ни треба и свест за афирмација, така ќе си помогнеме себеси, рече Велиновски.

Новиот Центар за дизајн и иновации – Јавна соба, кој е единствен од ваков вид на Балканот како урбан, иновативен и мултимедијален простор, на дизајнерите им го обезбеди Министерството за култура.

Министерката Елизабета Канческа-Милевска ја нагласи важноста на креативните индустрии на кои во последните три години им се посветува посебно внимание, така што преку конкурсите Министерството за овој сектор финансиски поддржа 150 проекти.

- Овие проекти го унапредија развојот на креативните индустрии кои денеска веќе се препознаваат како важен економски ресурс. До 4 декември е отворен и четвртиот конкурс за финансирање проекти од областа на креативните индустрии за 2016 година. Упатувам повик до сите млади дизајнери да аплицираат и да го насочат својот потенцијал и творечка енергија кон создавање производи кои уште еднаш ќе ја потврдат профитабилната димензија на културата, истакна Канческа-Милевска.

Изложбата „Млади балкански дизајнери“ е поставена на поткровното ниво од Центарот Јавна соба. Таа произлезе од Балканската дизајн мрежа, формирана минатата година, и веќе успешно се промовира и надвор од границите на Балканот. По претставувањето во Истанбул, ќе патува во Будимпешта, а потоа во Келн - на најголемиот саем на индустријата за мебел.

(Преземено од МИА)
 

Содржината е прочитана 442 пати.