Култура

Романот „Ереб“ од Урсула Познански објавен на македонски јазик

Бестселерот „Ереб“ издаден од „Бата прес“ со поддршка на ЕУ и Министерството за култура е дел од проектот на оваа издавачка куќа под мотото „Време е за книга“, со кој наскоро ќе бидат објавени 10 мега популарни книги за млади од реномирани и европски автори од различни земји

четврток, 27 февруари 2020

Во издание на „Бата прес“ на македонски јазик е објавен романот „Ереб“ од познатата австриска писателка Урсула Познански. Објавувањето е поддржано од Европската унија и од Министерството за култура, во рамките на проектот „Креативна Европа“. Станува збор за светски бестселер кој досега е преведен на 36 јазици. Романот од германски го преведе Катерина Јосифовска.

„ЕРЕБ“ е компјутерска игра. Таа те набљудува, разговара со тебе, те наградува, те проверува, ти се заканува...
Ник е опседнат со „Ереб“, играта што во неговото училиште се пренесува од рака на рака. Правилата се многу строги: секој има само една можност да одигра. Притоа мора да биде сам и за „Ереб“ не смее да зборува со никој. Кој ќе ги прекрши овие правила или нема да ги исполни задачите, отпаѓа од игра и повеќе не може да почне пак. Најнеобичниот дел е што задачите на „Ереб“, мора да се исполнат не во виртуелниот, туку во вистинскиот свет.

„Што е, всушност, ’Ереб’ и што бара од играчот? Може ли Erebos, (Богот на подземјето) да убива? Дали мртвиот автор преку играта што ја измислил имал намера да убие за одмазда?“, прашува германско австрискиот издавач кога го најавува првиот дел на романот.

„Трилер на годината!“, пишува за романот угледниот германски весник „Ди цајт“(DieZeit)
„Волшебен роман за млади соочени со опасностите што ги крие виртуелниот свет“, пишува „Бригите магазине“(BrigitteMagazine) 

Стилот на пишување на Познански стана многу привлечен за сите генерации, иако најмногу ги привлекува младите. На многу интересен начин ги обелоденува социјалните и психолошките предизвици, како и опасностите со кои човештвото се соочува при вмрежувањето на модерниот електронски, виртуелен со реалниот свет.

Романот е наградуван повеќекратно со високи признанија, меѓу кои во 2011 година беше добитник на престижната германска награда за литература за млади „DeutscherJugendliteraturpreis“, како и на наградата „Jugendjury“.

Урсула Познански е родена во 1968 година во Виена, Австрија. Авторка е на повеќе познати прозни дела и детски книги, но исто така пишува и филмски и телевизиски сценарија.

Романот „Ереб“ е дел од проектот на „Бата прес“ под мотото „Време е за книга“, со кој наскоро ќе бидат објавени 10 мега популарни книги за млади од реномирани и европски автори од различни земји. Проектот беше прифатен во ЕУ во силна меѓународна конкуренција. Визионерската цел на проектот е времето поминато по социјалните мрежи и на електронските уреди, младите да го заменат со читање книги во печатена или електронска форма.

 

Содржината е прочитана 283 пати.