Бизнис вести

Потпишани договори со 11 инвеститори за изградба на фотоволтаици во Свети Николе и во Македонски Брод

Со потпишувањето договори со девет компании ќе се градат фотоволтаици на државно земјиште со вкупна инсталирана моќ од 25 мегавти во Свети Николе и 10 мегавати во Македонски Брод

четврток, 30 јануари 2020

Договори со 11 инвеститори за изградба на фотоволтаични електрани со вкупна инсталирана моќ од 35 мегавати на државно земјиште на локациии во Македонски Брод и Свети Николе денеска беа потпишани во Владата.

„Само една година по донесувањето на новиот Закон за енегетика тука сме за да ги потпишеме договорите за изградба на 11 фотоволтаични електрани со капацитет од 35 мегавати на државно земјиште, а за петок е закажано и потпишување на договор за изградба на фотоволтаици на приватно земјиште со вкупен капацитет од 27 мегавати“, рече министерот за економија Крешник Бектеши.

Инвеститорите, со кои денеска потпишуваме договори за изградба на фотоволтаици, потенцира, на државата и дадоа 2,7 милиони евра.

Премиерот Оливер Спасовски рече дека реформата во енергетскиот сектор што се спроведе во изминатите две години е една од најзначајните.

„Денеска граѓаните плаќаат најниска цена на електрична енергија, што е резултат на направеното во изминатите две години. Една од главните цели на енергетиката е инвестирање во зелена енергија“, посочи Спасовски.

Со денешното потпишување договори со девет компании, како што кажа, ќе се изградат 11 фотонапонски централи на државно земјиште со вкупна инсталирана моќ од 25 мегавти во Свети Николе и 10 мегавати во Македонски Брод.

Пренесено од МИА
 

Содржината е прочитана 215 пати.