Бизнис вести

„Македонија2025“ доделува шест стипендии за кариерно усовршување на извршни директори и менаџери во САД

Исклучителна можност за врвна едукација на македонските извршни директори и менаџери преку менторство, вмрежување и практично учење

петок, 24 јануари 2020

Меѓународната невладина организација „Македонија2025“ го објави повикот за аплицирање на престижната Програма за извршни директори - Зафировски, преку која се доделуваат стипендии за светски познатата Келог-школа за менаџмент (Kellogg School of Management) во САД. Кандидатите ќе имаат можност да изберат помеѓу две тринеделни обуки: програма за развој на извршни директори или програма за корпоративно управување.

Програмата за развој на извршни директори се фокусира на подобро разбирање на окружувањето во кое се одвива бизнисот, клучните функционални области на управување, развој и на спроведување на корпоративната и деловната стратегија.

Програмата за корпоративно управување ги унапредува вештините на менаџерите за управување со раст и водење на компанијата низ предизвиците и можностите на современиот глобален пазар и влијае врз натамошен лидерски развој на учесниците со цел раст на компаниите.

Програмите за обука на извршните директори се дизајнирани во чекор со постојаните предизвици и комплексноста на современото лидерство. Тие ќе ги обноват и надоградат веќе стекнатите вештини на македонските бизнис професионалци и ќе придонесат кон понатамошниот развој на македонските компании, а со тоа и на целокупната економија.

Повикот е отворен до 20-ти февруари 2020 година. Повеќе информации за критериумите и начинот на аплицирање можете да најдете во отворениот повик на официјалната веб-страница на „Македонија2025“.

За сите дополнителни прашања може да контактирате на office@macedonia2025.com.


 

Содржината е прочитана 68 пати.