Бизнис вести

Потпишан Меморандум за соработка за подобра трговија во рамките на ЦЕФТА

Меморандумот треба да овозможи и усогласувањето на придружната документација при прекуграничното движење на стоки во регионот, како и меѓусебно признавање на ветеринарни и фитосанитарни сертификати

вторник, 25 јуни 2019

Претставниците на Коморскиот инвестициски форум (КИФ) вчера потпишаа Меморандум за соработка за подобрување на трговијата во рамките на ЦЕФТА регионот, кој треба да овозможи отстранување на бариерите во трговијата, усогласувањето на придружната документација при прекуграничното движење на стоки во регионот, како и меѓусебно признавање на ветеринарни и фитосанитарни сертификати.

Меморандумот го потпишаа претседателот на Управниот одборот на Коморскиот инвестициски форум (КИФ ЗБ6)м Марко Чадеж, директорот на Секретаријатот на ЦЕФТА, Емир Ѓикиќ и Томислав Кнежевиќ од Германската организација за меѓународна соработка (ГИЗ).

Марко Чадеж, кој е и претседател на Стопанската комора на Србија, изјави дека коморите од регионот се обидуваат да работат заедно со властите, со цел изнаоѓање заеднички системски решенија, а воведувањето меѓусебно признаени овластени економски оператори (ОЕО) за трговијата во регионот, чиешто формирање е во тек, ќе им овозможи на компаниите да ја поминат фазата на регистрација во една земја и тој статус да им се признае во целиот регион.

„Сѐ е подготвено за меѓусебно усогласување и признавање на сите документи, не само за меѓусебно признавање на статусот на овластен економски оператор, туку и меѓусебно признавање на документи, особено ветеринарни сертификати и фитосанитарни сертификати во областа на земјоделието. Ова се секојдневните проблеми со кои се соочуваат бизнисмените во нивниот редовен бизнис. На нас ни останува да обезбедиме меѓусебно признавање на целосната документација, за да може кога камионот ќе влезе на Хоргош, во Драч да го истовари на брод без претходни застои“, рече Чадеж.

Тој појасни дека компаниите коишто еднаш ќе се регистрираат преку овој систем, нема да имаат проблеми на граничниот премин, бидејќи целата документација ќе биде меѓународно призната, што е предуслов за функционирање на заеднички и единствен пазар.

„Целта на овој договор е да се зајакне дијалогот и партнерството во регионот и приватниот сектор да има можност да биде дел од одлуките и договорите на регионално ниво. Основната цел е да се отстранат бариерите за да може позитивно да влијаат врз економскиот развој и подобрување на имиџот на регионот. Само таков регион може да биде привлечен за инвеститорите и само на тој начин проблемите ќе можат да се решат“, истакна Сафет Оерџелиу и додаде дека во рамките на КИФ повеќе од 350.000 компании се членки на националните комори.

Директорот на Секретаријатот на ЦЕФТА, Емир Ѓикиќ, истакна дека на 1 јули стапува на сила одлуката за целосна кумулација и враќање на увозни давачки на увозот од трети земји во рамките на ПЕМ Конвенцијата и дека за економијата во регионот носи корист од околу 100 милиони евра.

„Во моментот се работи на заедничко признавање на овластените економски оператори ОЕО“, рече Ѓикиќ, додавајќи дека во споредба со европските земји, каде што има околу 17.000 ОЕО, во регионот има 20, со исклучок на Молдавија и дека целта на Меморандумот е да се поттикне економијата да започне да функционира на начин како што е регулирано во ЕУ и да го зајакне капацитетот за пристапување кон Унијата.

Томислав Кнежевиќ додаде дека ГИЗ има одлична соработка со Секретаријатот на ЦЕФТА уште од 2012 година, како и дека во изминатите шест години се имплементирани голем број активности кои се во насока на зголемување на трговијата на територијата на Југоисточна Европа, но и за намалување на бариерите кои се присутни во трговијата.

 

Содржината е прочитана 53 пати.