Култура

Емин Џијан: „Музиката е најмистериозната појава“

Македонскиот композитор, аранжер, продуцент, диригент и организатор на спектакуларни музички проекти синоќа во црквата „Света Софија“ одржа предавање „Музиката денес“ што беше во организација на „Охридско лето“

среда, 12 јуни 2019

Предавање на тема „Музиката денес“ се одржа синоќа во црквата „Света Софија“ во Охрид, во организација на Националната установа „Охридско лето“ и генералниот спонзор на оваа музичко-сценска манифестација Македонски телеком.

Македонскиот композитор, аранжер, продуцент, диригент и организатор на спектакуларни музички проекти,уметникот Емин Џијан, говорејќи на темата укажа на различните перцепции во музиката, а се задржа и на начините на кои таа се создавала во минатото и денес.

Овој уметник е познат по тоа што создава фузија од секакви музички жанрови, но сосредоточени во силен авторски израз и музиката ја дели на добра и лоша, поточно на вистинска и комерцијална.

„Одговорот на прашањето како може да се разликува квалитетната музика е многу мистериозно. Впрочем и самата музика е најмистериозната појава. Музиката е временска уметност. Самиот концерт или настан што се случува во моментот и дава една посебна димензија и само луѓето кои се присутни во тој момент и на тој простор можат вистински да ја уживаат музиката и да ја почувствуваат магијата, бидејќи не е исто како носач на звук кој се слуша дома, во фотелја или во автомобил“, појасни Џијан.

Директорката на НУ „Охридско лето“, Наташа Поповиќ истакна дека предавањето беше одлично, а особено радува што беа изнесени информации за слушателите поврзани со музиката во минатото, која всушност е база за се она што се создава денес како квалитетна музика музика.

„Бидејќи и самата доаѓам од светот на класичната музика, сметам дека се’ ова што се случува денес со новата технологија, иако е многу олеснето, дава друга тежина. Сепак, базата ја сочинуваат Бах, Бетовен, Моцарт“, рече Поповиќ.

По синоќешното предавање се одржа и концерт на квартетот на Џијан во чиј состав се Гоце Стевковски на тапани, Кирил Кузманов на алт саксофон и флејта и Кирил Туфекчиески на контрабас. Квартетот понуди авторски композиции на Емин Џијан прилагодени за овој состав.

Охридската публика го памети Џијан по реализацијата на спектакуларните проекти со Дерик Меј во 2014 година, како и со Хуан Аткин во 2018 година, кои настапија заедно со Македонската филхармонија.

 

 

Содржината е прочитана 194 пати.