Бизнис вести

ACI го рангира охридскиот аеродром меѓу најдобрите три со највисок раст во Европа

Според ACI, „Св.Апостол Павле“ бележи 63,9 проценти пораст на патничкиот сообраќај во првиот квартал од 2019 година, а 96,9 отсто пораст на патничкиот сообраќај во март 2019, споредено со март 2018 година

вторник, 14 мај 2019

Аеродромот „Св. Апостол Павле“ – Охрид, управуван од страна на ТАВ Македонија, е рангиран во најдобрите три аеродроми во Европа што постигнале највисок раст во првиот квартал од 2019 година, во група на Меѓународниот совет на аеродроми (Airports Council International-ACI) од аеродроми со под 5 милиони патници годишно.

Според ACI, охридскиот аеродром бележи 63,9 проценти пораст на патничкиот сообраќај во првиот квартал од 2019 година, а 96,9 % пораст на патничкиот сообраќај во март 2019, споредено со март 2018 година. Во категоријата на аеродроми со помалку од 5 милиони патници годишно, само италијанскиот аеродром во Таранто (+152.2%) и грузискиот аеродром во Кутаиси (+101%) имаат поголем раст во првото тримесечје од 2019 година од вториот аеродром во Северна Македонија.

„Ова признание од страна на ACI Europe е потврда за нашите силни напори да воспоставиме постојан пораст во авиосообраќајот на двата аеродрома управувани од страна на ТАВ Македонија. На Аеродромот ’Св. Апостол Павле’ во Охрид забележавме неверојатен пораст во бројот на патници, односно 64 проценти поради трите нови авиолинии отворени во последните 6 месеци – Виена во ноември 2018, Малме и Милано во март 2019 година. Со дополнителните четири нови дестинации што ќе бидат воведени од ова лето – Меминген, Дортмунд, Штутгард и Дизелдорф, очекуваме да одржиме висока стапка на пораст на охридскиот аеродром, притоа достигнувајќи нови рекорди“, изјави Алпер Ерсој, генерален директор на ТАВ Македонија.

Споредено со просечниот пораст на патничкиот сообраќај на европските аеродроми (+4.4%), порастот на аеродромот во Охрид е поголем за 60 проценти. Со стапка на раст од 5,6 проценти во првото тримесечје од 2019 година,
Меѓународниот Аеродром Скопје, во првиот квартал од 2019, исто така бележи повисок просек од оној низ Европа.

Од неодамна, швајцарската водечка авиокомпанија Edelweiss воспостави нова директна авиолинија од Охрид до Цирих. Оттука, аеродромот „Св. Апостол Павле“ во Охрид има 5 редовни авиолинии, Виена, Базел, Цирих, Малме и Милано и 8 сезонски дестинации до Амстердам, Брисел, Тел Авив, Варшава, Катовице, Истанбул, Ајндховен и Талин, а на истите сообраќаат 11 авиокомпании.

„Првите четири месеци од 2019 година ги завршивме со речиси 700.000 патници на Меѓународниот Аеродром Скопје и Аеродромот ’Св. Апостол Павле’ – Охрид, односно со 10 проценти пораст на годишно ниво. Скопскиот аеродром ја оствари очекуваната стапка на пораст во бројот на патници од 7 отсто за периодот јануари-април, што очекуваме да бидеме повисока во вториот и третиот квартал од годината, поради отворањето на 4 нови дестинации, Баден-Баден и Бремен, што започнаа да сообраќаат во март, како и Ларнака и Турку, што ќе бидат воведени во јули 2019 година“, додаде Ерсој.

Во првите четири месеци од 2019 година, вкупно 694.227 патници патувале преку двата македонски аеродрома, што е пораст од 10 проценти споредено со истиот период во 2018 година.
 

Содржината е прочитана 124 пати.