Култура

Доделена книжевната награда „Табернакул“

Во новиот објект на Македонскиот народен театар синоќа свечено беше врачена Меѓународната книжевна награда Табернакул на овогодишните лауреати Херта Милер и Том Стопард.

петок, 16 октомври 2015

Во новиот објект на Македонскиот народен театар синоќа свечено беше врачена Меѓународната книжевна награда Табернакул на овогодишните лауреати Херта Милер и Том Стопард. На настанот на кој присуствуваа и претседателот на Владата на РМ, Никола Груевски, министерката за култура Елизабета Канческа-Милевска и бројни гости од јавниот и културниот живот, беа промовирани и нови четири изданија на „Табернакул“, чии автори се овие еминенти писатели.

За ликот и делото на Херта Милер говореше Виктор Ерофеев, руски писател и претходен добитник на оваа награда, а за творештвото на Том Стопард свое обраќање имаше Горан Стефановски.

Дела од овие исклучително значајни автори се застапени и во едициите на Владата на Република Македонија и Министерството за култура „Ѕвезди на светската книжевност“ и „Превод на добитници на Нобелова награда за литература“. На македонски јазик преведени се „Ѓаволот седи во огледало“ и „Животинско срце“ од германската писателка и добитничка на Нобеловата награда за книжевност во 2009 година, Херта Милер. Од британскиот драмски писател и автор на сценариото за филмот „Вљубениот Шекспир“ на македонски јазик како сегмент од едицијата „Ѕвезди на светската книжевност достапeн е избор со повеќе драмски дела, меѓу кои и култната драма „Розенкранц и Гилденстерн се мртви“.

Целта на оваа книжевна награда е да ги промовира најзначајните, светски признати книжевни вредности на македонски јазик, како и да покаже дека Македонија е земја со долга книжевна и културна традиција, земја што покажува особена почит за сите актуелни книжевни и културни глобални достигнувања.

Книжевната награда Табернакул ја претставува бронзена скулптура чиј автор е академскиот вајар Горан Стаменков. Лауреатите, исто така, добиваат и златник од Книжевната академија Табернакул, како и паричен износ од 5.000 евра.


(Преземено од МИА) 

Содржината е прочитана 483 пати.