Бизнис вести

Македонија и Германија ќе формираат заеднички економски комитет

Иницијативата за формирање ваков комитет е произлезена од официјалната средба на премиерот Зоран Заев со германската канцеларка Ангела Меркел со што се очекува сериозна помош и поддршка од Германија

вторник, 13 ноември 2018

На 23 ноември ќе се формира заедничкиот управувачки економски комитет со Сојузна Република Германија, која е најголем трговски партнер на Македонија, најави денеска премиерот, Зоран Заев на средбата со бизнисмените од Стопанската комора на Македонија.

Иницијативата за формирање ваков комитет е произлезена од официјалната средба со германската канцеларка, Ангела Меркел и со формирањето на комитетот се очекува сериозна помош и поддршка од Германија.

„Управувачкиот економски комитет што ќе го формираме има за цел Германија да испрати сериозна помош и поддршка. Ќе има и грантови и донации кои ќе стигнат од Германија, но сериозната поддршка значи и мегдан за отворање нови пазари“, рече Заев додавајќи дека годинава се очекува трговската размена со оваа европска држава да надмине четири милијарди евра.

Најави дека од Германија ќе пристигат двајца советници со искуство особено за дуелното образование.
Премиерот оцени дека економските трендови се добри и оти Македонија кон Германија и Грција бележи двоцифрени зголемувања на извозот во однос на увозот.

Пренесно од МИА

 

Содржината е прочитана 190 пати.