Инфо

Ќе се намалува старосната граница за пензионирање на рударите

Со предложените законски измени рударите ќе можат да остварат право на старосна пензија и со навршување на 40 години пензиски стаж за мажи, односно 35 години за жени

понеделник, 16 јули 2018

Министерството за труд и социјална политика, преку Владата ќе предложи законски измени и дополнувања со кои ќе се намалува старосната граница за пензионирање на рударите. Оваа промена вчера ја соопшти минстерката за труд и социјална политика, Мила Царовска на средба со рударите во Македонска Каменица, менаџментот на рудникот САСА, со дел од Синдикатите и со градоначалничката Соња Стаменкова.

„Согласно ветеното во програмата за работа, Министерството за труд и социјална политика преку Владата изготви законско решение со кое рударите ќе можат да остварат право на старосна пензија и со навршување на 40 години пензиски стаж за мажи, односно 35 години пензиски стаж за жени“, рече Царовска.

Со прделог измените и дополнувањата на Законот за пензиско и инвалидско осигурување се овозможува на осигурениците кои работат на работни места на кои стажот на осигурување им се смета со зголемено траење, да им се намалува возраста за пензионирање пропорционално на времето поминато на работа со бенефициран стаж. Ова решение во моментот се однесува само за рударите, но со него се создава можност истата формула за пропорционално намалување на возраста да се применува на сите работници кои работат на работни места со бенефициран стаж.

Министертсвото за труд и социјална политика ќе продолжи со ветените активности во делот на бенефицираниот стаж за што веќе е подготвена анализа со поддршка на Светска банка, а ќе се прави и ревизија на сите работни места за кои стажот на осигурување се смета со зголемено траење.

 

Содржината е прочитана 82 пати.