Инфо

Геотермалната топлина може да биде и наша енергетска иднина

Tреба да се засили законската контрола за исполнувањето на еколошките стандарди во индустријата за што неопходно е да се вработат повеќе инженери за заштита на животната средина, вели професорот Јосиф Јосифовски

четврток, 12 јули 2018

Македонија, според својата геолошка градба на теренот и клима, како и годишните енергетски потреби за греење и ладење со прилично изедначени сезонски енергетски потреби, претставува идеален регион за примена на системите за геотермална енергија, вели професорот на Градежнит факултет во Скопје, Јосиф Јосифовски во интервју за МИА.

Тој посочува дека геотермалната топлина може да биде наша енергетска иднина, бидејќи температурата во подземјето под десеттиот метар длабина е константен и се движи помеѓу 12 и 18 степени Целзиусови.

Примената на геотермалните системи во Македонија досега е минимална, вели Јосифовски, иако пред повеќе години неколку фирми имаа сериозен обид за популаризација на оваа технологија на нашиот недоволно развиен енергетски пазар.

„Во време кога остатокот од светот ја зголемува примената на обновливите и еколошки извори на енергија, во Македонија доминираат фосилните горива кои ослободуваат големи количини јаглеродни гасови во атмосферата. Во зимскиот период користењето на дрвата и нафтата за загревање во домаќинствата предизвикува дополнително загадување, исто како и прекумерната употреба на моторни возила во недостатокот на ефикасен и еколошки транспорт“, истакнува Јосифовски.

Наша должност, а и обврска кон идните генерации, како што додава, е да сториме се за да го намалиме загадувањето од фосилните горива.

Според него, треба да се засили законската контрола за исполнувањето на еколошките стандарди во индустријата за што неопходно е да се вработат повеќе инженери за заштита на животната средина.

„Потребно е да се преземат систематски и добро осмислени мерки преку кои државата со субвенционирање во набавката и инсталацијата на обновливите и еколошки извори на енергија ќе придонесе за почиста иднина. Гасификацијата на градовите и примената на природниот гас во домаќинствата, не е само поевтина туку и еколошка алтернатива“, додава тој.

Јосифовски посочува дека во Европа „Зелениот дизајн“ на зградите е сè попопуларен, а зелените покриви се нешто што може да се види во многу урбани центри.

„Тие се добра алтернатива за недостигот на зелените површини во густо изградените урбани подрачја. Паралелно, воведувањето ниско-емисиони средства за јавен превоз дополнително може да влијаат врз ’шпицовите’ на дневните загадувања. Хибридните и електричните возила се вистинско решение и вистински хит во европските земји, особено за потребите на градското транзитирање, а воедно се и поекономичен избор“, истакнува проф. Јосифовски во интервјуто за МИА што ќе биде објавено викендов.

 

Содржината е прочитана 41 пати.