Инфо

Од патарини за пола година собрани 55 милиони денари повеќе од лани

Директорот на ЈП за државни патишта, Зоран Китанов вели дека претпријатието во вториот квартал од годинава има остварено инвестиции во вкупен износ од околу 36 милиони евра што е за 9,8 милиони евра повеќе во споредба со истиот период лани

петок, 06 јули 2018

Јавното претпријатие за државни патишта (ЈПДП) во првото полугодие од 2018 година остварило зголемен приход од патарини за 55 милиони денари или 5,3 проценти повеќе во споредба со истиот период од 2017 година.

Како што информира директорот на ЈП „Државни патишта“, Зоран Китанов, на прес-конференцијата во Владата, тоа се должи на зголемениот интензитет на сообраќај и подобрата организираност на патарините.

„За десетина дена очекувам да почне да функционира електронската наплата на патарините и тоа во прво време на Коридорот 10. Во моментов подготвени се патарините кај Романовце, Сопот и Отовица. Се прават напори и за патарината кај Кавадарци, но со надградување на постоечкиот софтвер. Од септември ќе се работи и на патарините на Коридорот 8“, рече Китанов.

Китанов информира и дека ЈПДП во вториот квартал од годинава има остварено инвестиции во вкупен износ од околу 2,2 милиони денари, односно 36 милиони евра, што е за 9,8 милиони евра повеќе во споредба со истиот период лани, односно, зголемувањето е за 37 проценти.

Инаку, со околу 20 милиони евра буџетски средства и со средства на ЈПДП веќе се работи на рехабилитација на регионални патишта во должина од 230 километри.

„Со 86 милиони евра средства обезбедени од Европската банка за обнова и развој се планира рехабилитација на 26 патни правци во должина од 422 километри. Со 14 милиони евра од Светска банка се работи на рехабилитација на 13 патни правци во должина од околу 150 километри. Дел од проектите ќе бидат завршени оваа година, дел ќе бидат започнати, но еден дел се очекува да бидат комплетирани во различни временски интервали следните неколку години“, рече Китанов.

Инаку, како што претходно објави Владата, само за оваа година обезбедени се вкупно 270 милиони евра за изградба на нови патни правци, за комплетирање на започнатите инфраструктурни проекти и автопати, како и за реконструкција, рехабилитација и заштита на регионални патишта, а во план е со овие средства да се работи на повеќе од 60 патни правци во земјава во должина од 800 километри.

Запрашан во врска со тоа колку дополнителни средства ќе бидат потребни за целосна реализација на патот Кичево – Охрид, Китанов рече дека во моментов нема точна сума, но оти преговорите се во тек и очекува таа да биде позната за десеттина дена.

Преземено од МИА
 

Содржината е прочитана 48 пати.