Инфо

Рудникот САСА ќе ги зголеми платите за 5.500 денари

Во јануари 2019 година работниците ќе добијат уште едно покачување од пет отсто, а во јануари 2020 уште пет отсто, со што од сега до 1 јануари 2020 година платата ќе им биде зголемена за 30 отсто

петок, 27 април 2018

Рудникот САСА одлучи да ги зголеми платите на вработените за 5.500 денари, соопшти денеска генералниот директор Нил Стивенсон.

Како што рече на прес конференцијата во седиштето на ССМ, покрај зголемувањето од 5.500 денари, во јануари 2019 година работниците ќе добијат уште едно покачување од пет отсто и уште пет отсто во јануари 2020 година, со што од сега до 1 јануари 2020 година платата ќе им биде зголемена за 30 отсто.

„Зголемувањето од 5.500 денари е многу добра понуда со која нашите вработени би добивале плата поголема од 40.000 денари месечно. Но, преговарачите сметаат дека тоа не е доволно и имаат нереални барања за зголемување на платата од 270 отсто, што е плата поголема од 2.000 евра месечно. Таква сума не можеме да исплаќаме, зашто ќе влијае врз нашата оперативност, а веројатно и врз иднината на компанијата“, истакна Стивенсон.

Мултиетничкиот синдикат на образование (МЕСО), што преговараше за зголемување на платите, не ја отфрла понудата на САСА, но ќе ја разгледува на највисоко ниво, по што ќе одлучи дали ќе ја прифати.

„Задоволни сме од преговорите. Ова првпат се случува во Македонија некој да зголеми плата за 5.500 денари. Но, компанијата е многу добра со одличен менаџерски тим поради што и нашите барања се од таков обем“, рече претседателот на МЕСО, Драги Јовановски.

Преземено од МИА

 

Содржината е прочитана 83 пати.