Бизнис вести

Нема одлука за издавање еврообврзница, но таков чекор не се исклучува

Министерството за финансии може да издаде ваков инструмент само со усвојување на одлука на Влада, а во моментов таква одлука нема

четврток, 02 ноември 2017

Македонија испратила барање до неколку меѓународни банки за доставување предлози за издавање еврообврзница во првата половина на 2018 година, објави „Ројтерс“, повикувајќи се на банкарски извори.

Од Министерството за финансии, за МИА велат дека Владата во овој момент се уште нема донесено одлука за издавање државни хартии од вредност на меѓународниот пазар на капитал и оти во своето работење има редовна комуникација со меѓународните банки и потенцијалните инвеститори и ги следи движењата на пазарот на капитал.
Целта, како што посочуваат, е Министерството за финансии да донесува информирани и стратешки правилни одлуки. Врз основа на овие информации Министерството носи одлуки за идните начини на финансирање, зависно од условите. 

Појаснуваат дека Министерството за финансии може да издаде ваков инструмент само со усвојување на одлука на Влада, а во моментов таква одлука нема.

Последната еврообврзница Македонија ја издаде во јули 2016 година во вредност од 450 милиони евра со каматна стапка од 5,625 отсто и со рок на достасување јули 2023 година.

 

Содржината е прочитана 154 пати.